- Remruati Pa, Venghlui

He thu hi chanchinbu lamah a lo lang zauh zauh a, ka lo chhiar ve thin. Ka ngaih pawimawh leh ka rilru khawih zawng tak a nih avangin, chanchinbu-ah vek thu tlem ka han ziak ve e. Chanchintha Johana bung 17-ah chuan, nasa tak a Lal Isua a tawngtai thu kan hmu a, Pa Pathian hnenah ringtute kan inpumkhat theih nan a dil a ni. NEICC khawmpui-ah hian ka palai ve thin a, nuam ka ti thei em em mai a, a chhan chu hnam hrang hrang, kohhran denomination  hrang hrangte Lal Isua-ah chuan inunau leh inpumkhatna lama inkhawmpui a nih avang a ni. 

Ka rilruin, "Aw hnam zawng zawng leh chitin tawng tinte, Van Lal nau ang a tahna Kalvari-ah an dang chuang lo ve" tih hla kha ka lo sa ka lo sa thin. Mizoram-ah tu Kohhran mah hi tha famkim kan awm lo ang; chuti chung chuan, Kohhran hoten kan ngaihdan inang leh kan thil intawm atam zawh poh leh Krista a kan inpumkhatna a takin a lang a, rawngbawl ho ti nuam tu a ni thin a ni.  Heti mai hian tunah pawh in unau leh inpumkhat kan nihna hi eng vang nge? tih hi a chhanna chu; Bible (Pathian Lehkhabu) Sunday (Pathianni) Lal tawngtaina, Kristian hlabu kan intawm theih vang hi a ni ti ila a dik thawkhat hle ang. Heng bakah hian thil pawimawh zualte pali (4) ka han tarlang teh ang.

1. January 11, 1894 chanchintha thlen ni: Pu Buanga leh Sap upate Mizoramah kum 4 zet cham a lo kalte Aizawl a an lo thlen ni a ni. He ni hi Mizoram a Kohhran ten Gospel Centenary ni 6 (ruk) chhung Programme a siam a, kan lawm a, January 11, 1994 ropui taka kan lawm kha a ni. Chuvangin he ni hi Mizoram a chanchin tha thlen ni-ah i pawm tlang leh ang u.

2. August 31, 1897 Mizoram Presbyterian Kohhran din tan ni; Welsh Missionary hmasa ber D.E. Jones (Zosaphluia) an, 'Thlawhhma a rawn siam tak ni,' Mizoramah Presbyterian din tan na ni a ni.

3. Ni 3 March, 1903 Mizoram Baptist Kohhran din tan ni; Pu Buanga leh Sap Upa te Kohhran din leh enkawl tura Lunglei an thlen ni hi, Mizoram Baptist Kohhran din tan ni a ni.

4. Ni 26 September, 1907 Evangelical Church of Maraland din tan ni; Maraland a Missionary hmasa ber Rev. R.A Lorrain leh a thiante Serkawn an thlen ni a ni. He ni hi Evangelical Church of Maraland (ECM) Kohhran din tan ni a ni.A hma lama tarlanbakah a chunga point pali tal hi chuan Kohhran hote kan ngaihdan intawmin inang thei se la a va tha dawn em; tichuan, Mizoram Kohhrante inpumkhatna tur leh Church Council din chu sawi zui a nuam deuh ngei ang le.