Aizawl: Tunhnaiah Kolasib atanga lirthei rukbo hi a hluar hle a, January ni 14 zan khan LPK tripper (MZ05A/ 4006) chu a neitu Laltanpuia ten Vengthar an in bula an dahna atangin a bo a, nikum September atang khan lirthei bo, police te hnena thleng hi 8 ni tawhin a tam zawk chu two wheeler a ni.
Kumin bikah lirthei bo, police-ten an ziahluh chu pathum niin January ni 3 zan khan Rohmingliana, Gosen veng tipper MZ01/G-9929 chu rukbo a ni a, a hnuah Bilkhawthlir bul, Sualtlenfaina lui bulah accident-a a hmuh a ni. hei bakah hian January 14 zan khan C Lalrinmawia s/o C Lalparliana, Khuangpuilam bike, MZ05A/2413 chu an dahna atanga rukbo a ni a, police te hnenah FIR thehluh niin hmuh a la ni lo.
Thla liamta December 23 zan khan Yamaha bike, R15 (v-3) MZ05A/3897, R Malsawmkima s/o R Lalramhluna, New Diakkawn ta chu rukbo a ni a, December 14 zan dar 9 hnu khan R15 bike tho, MZ05A/0551 R Lalnunpuia, Venglai ta chu rukbo niin December 11 zan khan mut hnuah Lalhmangaihkima Hnamte, Khawlailung, hnathawh avanga Khuangpuilama awm bike, Gixxer, MZ01N/0727 chu an dahna atanga rukchhuah a ni bawk.
Hetih lai hian November 28 zan dar 8 hnu khan Thingdawl Vengthar atangin Scooty Fascino, MZ05 A/2253 chu a bo a, November 15 zan khan Emanuel Lalpiangruala bike Gixer, MZ01 L/2632 chu an in Rengtekawn-a an dah chu rukbo a ni bawk. Hemi hma September 9 zing dar 2-4 khan Dr Lalhriatrenga s/o Thantluanga (L) Diakkawn bike Gixxer, MZ01M/0859 chu an in bula a dah a bo laiin October thla khan lirthei bo report a awm lo thung. Heng bakah hian lirthei bo, mahse a hnua hmuh leh ang chi thahnem tak report a awm bawk.
&&&&&&