ZALEN September 2, 2023 : Tunhnaia Kolasib khaw chhunga ration buhfai an semah a tha lo a tam hle a, chhungkaw thenkhat phei chuan an buhfai lak te ei lovin midang hnenah ran chaw atan an hralh nia thudawn a ni.

ZALEN in Kolasib atanga thu a dawn danin buhfai tha tawk lo awm te hi supplier te hnen atanga an dawn a ni a, FCI atanga an buhfai lak zingah erawh buhfai chhia a awm lo nia thudawn a ni. Kolasib District Civil Supply Officer Lianchhuma Chinzah chuan kumin June leh July thla vela supply department kaltlanga ration semchhuah buhfai thenkhat chu a tha tawk lo tih a sawi a. Mipuite hnena buhfai tha vek sem turin FCI atanga an lei loh chhan zawhna chu, "FCI atanga sorkarin buhfai kan leina rate hi a sang em em a, mipuite hnenah a man chanve in kan pek leh a ngai si a, hei vang hian a man tlawm zawk private atanga supply hi kan lei a ngai a ni," a ti. 

Card pawl (Priority Household - PHH ration card) hmangtute chu thlakhatah mi pakhat tan 8 Kgs sem tur ni mahse FCI buhfai hmuh atangin 5 Kgs pek a ni a, 3 Kgs dang chu private (open market) atanga lei a ni. Card eng (Antyodaya Anna Yojana - AAY ration card) hmangtute erawh thla khat atan 35 Kgs tawp ruahman a ni thung. Sawrkar laipui chan National Food Security a kalpui hnuah a thlawn liau liau in Mizoram sorkar chuan FCI atangin buhfai a dawng a, mahse FCI buhfai te hi mipui mamawh sem daih a nih loh vangin hmundang atanga lei belh a ngai niin DCSO chuan a sawi bawk.