ZALEN, 24.5.2024 :Urban Development & Poverty Alleviation department director Dr. Andrew H. Vanlaldika chuan Kolasib Solid Waste Management Centre enkawl chungchangah an hlawhchham tih a sawi a, Kolasib chauh ni lovin Mizoram hmun hrang hrangah tun atanga kum tawp lamah chuan a tam zawkah hma an sawn viau a beisei tawh thu a sawi niin Kolasib Aw chuan a tarlang.

UD&PA director hian chanchinthar lamah Kolasib district MJA ten SWMC an tlawh thu leh an thil hmuh chungchang an tarlante avangin, Kolasib chu vawiin Zirtawpni (24.05.2024) a tlawh nghal rum rum a nih thu a sawi a, "Kolasib Solid Waste Management Centre hi pilot project mai a ni lova, model atan hman kan tum a ni. Hetah hian a hlawhtlin viau chuan district hrang hrangah pawh kalpui kan tum. Amaherawhchu a management lam hi kan la thiam tawk lo hi a pawi khawp mai," a ti.

Kolasib SWMC atan sorkarin sum tam tak a sengral tawh tih pawh director hian a sawi a, Helai hmun atan hian khawl tha tak tak pawh lei mahse chung enkawltu tur chuan mihring tho an pawimawh tih a sawi a, Material Recovery Facility chu a tet deuh avangin sorkarah dil a nih thu leh MCC zawh hunah Rs. 20 lakh sengin tih zauh tum tih a sawi.

Bawlhhlawh sawngbawl tur khawnkhawm man chungchangah VC te leh department chuan 50/50 in an in sem tih a sawi a, tunah hian Khuangpuilam chu Kolasib-ah mahni puala bawlhhlawh khawnna motor nei an nih thu a sawi. Hetih rual hian Mizoram hmun dangah VC thenkhat, bawlhhlawh man an khawnchhuah department hnena submit tha duh lo an awm tih a sawi bawk. 

Director sawi danin tunah hian department chuan bawlhhlawh trip 1 zelah Rs. 3500 a seng thin a, Kolasib SWMC ah hian awm tura ngaih awm lo a la awm nual a, belt conveyor machine te pawh a awm loh chuan hnathawh theih ni lo mahse tun dinhmunah a la awm lo a ni.

Kolasib SWMC hi 34400 sqm a zau niin bawlhhlawh hi nitin tone khat zel sawngbawl thei tura ruahman a ni. Swachh Bharat Mission (Urban) sum Rs. vbch 7.08 sengin din a ni a, DPR phase I hnuaiah 2016 atangin hna hrang hrang thawh tan a nih hnuah phase-II pawh 2018 atangin thawh tan veleh a ni. Bawlhhlawh zingah mihring hriselna atan hlauhawm (domestic hazardous waste) te chu Landfill Clearance neih hnuah Sanitary Landfill-ah mumal taka paih tura duan a ni a, September 3, 2021 ah hawn ni mahse May 2021 atangin bawlhhlawh hi paih a ni tawh thung.