Aizawl: Krismas leh Kumthar ralmuang taka hman zawh a ni a, dan leh thupek kenkawh kawngah Police ten harsatna lian an tawk lo a. Hetih lai hian zu erawh an man hnem hle thung. Zalen palaiin a biaknaah IGP (Law & Order) LH Shanliana chuan Krismas leh Kumthar vuakvetah dan leh thupek kenkawh kawngah police-ten harsatna lian an nei lo tih a sawi. LH Shanliana chuan, “Thlamuang taka hunpui hman anih theihnan ram pum huap bakah district leh Police Station level ah te coordination committee kan siam a, hengah te hian Police, Excise & Narcotics department leh YMA te nen hma kan la a, mipui thlawpna kan hmuh that bawk avangin harsatna kan nei lo a ni,” a ti. IGP chuan Mizoram chhung bakah Mizoram leh state dang inkalpawhna hmun pawimawh 10-ah te check post an siam tih sawiin heng hmunah te hian tlawmngai pawlte nen an duty tlang thin niin a sawi bawk. Krismas leh Kumthar vuakvetah hian Mizoram Police-te chuan zu leh a kaihhnawihah man an nei ngah hle a, zu kaihhnawih case 56 an ziak lut a ni. Aizawl khawpui chhungah ringawt pawh zu kaihhnawihah hian mi 31 man an ni a, police-ten zu an man hlut zawng hi Rs. 78000/- hu vel nia chhut a ni. Mizoram sawrkarin halpuah, halmawi leh silai lem, a mu kapchhuak thei zuar lo tur leh hal lo tura a ngenna bawhchhia mi 15 man an awm bawk a. Silai lem, a mu kapchhuak thei zuar hi mi 8 manin halpuah leh halmawi zuar leh hal mi 7 an man bawk. Silai lem, a mu kapchhuak thei hi Aizawl P/S huam chhungah mi 8 man an ni a, halpuah leh halmawi zuar leh hal hi Aizawl P/S ah mi 4 leh Kulikawn P/S huam chhungah mi 3 man an ni a. Aizawl khawpui huam chhunga police-te zu man hi rakzu litre 924, a sen chi (IMFL) um 111.5 leh Beer can 4 a ni.