- K.L.Rochama “Kan ei kan in Krismas se” tiin ruai nen Krismas chu kan lo hmuak leh ta mek a. Hlim taka Krismas hman theih loh hlauvin Kohhranhote chuan sum tam tak sengin Camping-te kan buatsaih a. Mahse, kum dang ang bawkin, “Camping Harhna” chuan Krismas pawh a ban phak leh dawn ta lovin a lang a. Kumin kumthar tuka ka inkhawmnaa thusawitu, an Kohhran Chairman chuan, “November thla leh December thlaah camping kan nei a. Mahse, zing tawngtai inkhawmah pakhat mahin kan pung chuang lo va. Kohhran Upa thlang thei khawp pawh kan inkhawm thei lo a nih kha,” tiin duhthaw takin a sawi a. He Kohhran Upa thusawi hian ngaihtuahna a tithui hle. Krismas leh Kumthar ruai sachhumna mei a mih rualin Biak In lamtual a ruak leh nghal ang a, ruai thehna nawi inchuha ui insual thawm a reh rualin zaikhawm khuang rite pawh a lo reh leh tawh ang a; politic khel fuh, NLUP Pheichham mantute pawhin an pawisa dawn chu TV leh Mobile Phone lei nante an lo hman zawh tawh avangin contract leh therhlo dang dilin Minister chenna bathlar leh Party Office-te bel takin an zawh leh ang a, nula thenkhat urlawk zan lo hmang âm deuhte chuan an thla tin “Period” a khaihlak dawn em tih thaw dep depin an ngaichang ang a, nu leh pa tam takte chu an fate sikul sdmission fee leh uniform buaipuiin an hmanhlel leh dawn a ni. Thenkhat chuan nghakhlel taka an lo thlir Krismas chu anchhelawh tak an nap dawn a ni. Heti taka kan ngaih ropui, kum tin cheng vaibelchhe tam tak senga awmni khama kan lawm thin Krismas hlimna hian engati nge thla khat em pawh a daih theih loh chu le? A chhan zawnchhuah i han tum teh ang. 1. Thutak aia phurna kan ngaih pawimawh zawk vang: Mizote hian rilru fim taka thil ngaihtuah chet chet kan peih lo hle a. Ngaihtuah peih lo chuan thil tha a ngaihtuah chhuak ngai lo. Ka la hrereng a, 1978-a Berlin khawpuia World Congress on Evangelism an neih dawn khan German Theologian pakhat chu thumal 800 hmanga thu ziak turin an thlang a. Khawmpui neih hma thla 6-ah lehkha an pe a. He Theologian hian, “Hun min pe tawi lutuk,” tiin a theih loh thu a hriattir a. Hmanni lawk khan ka thian pakhat chuan an party khawmpuia ngaihtuah tur Economic, Social and Political Resolution ziaksak turin min rawn ngen a, zan khat chiah hun min pek avangin ka hnial a. German Theologian leh ka thianpa rilru put hmang atang hian Mizote hian zir tur kan nei tih kan hre thei awm e. Rilru phur theihna hi Pathianin min pek a ni a. Rilru phurna chuan min tihlim thei a, min tilungngai thei bawk a. Mahse, phur lutukna chuan rilru fim min hmantir theih loh avangin mi tam takin an kalsual phah thin a ni. Lal Solomona chuan, “Hriatna nei lova phur viau hi a tha lo,” a lo ti nghe nghe a ni (Thuf. 19:12) . Hei vang hi a ni ang Greek-ho zinga Stoic-ho chuan rilru phurna nei lo turin mi an zirtir thin a. Miin thutak an hriat theih nan phurnain a khawih chet zawh loh rilru nghet an nei tur a ni an ti a ni. Khawvel finna leh Bible zirtirna tluantling dawng pha lote hi a tlangpuiin chawh phur an awlsam a. Hei hi remchang a lain politic hruaitute leh evangelist te chuan thusawi thiamnain mi an au phur thin a. Thutak aiin thu pawnlang leh thil mak danglam chanchin hi mi mawl zawkte tan a ngaihnawm zawk avangin chhia leh tha hriatna pawh hmang thei lovin an bawh ruak ruak thin a ni. Isua’n chhangper 5 leh Sangha 2-a a hraipuarte chuan chhangper leh sangha thlahlelin Isua chu eng emaw chen an zui ve a. Mahse, Isua’n thutak “Nunna Chhang” thu a han hrilh chuan, “Hei hi thu khirh tak a ni, tunge hrethiam thei ang?” tiin an kal bosan leh mai a ni. (John 6:16). Romania ram chu hun rei tak Communist sawrkarin a awpbet tlat a, Kristiante chu nasa taka an tihduhdah avangin Pastor-te pawh ngawah te an biru thin a. 1989 Krismas dawn zanah Pastor Laszlo Tokes chu a bihrukna atangin a lo chhuak a, a Kohhranah thu a sawi a. Kohhran member-ten Isua pian thu sawi tura an beisei laiin Lal Heroda’n nausen kum 2 hnuai lam zawng zawng tihhlum vek tur thu a pek changthlanin awpbehna (oppression) leh tharum thawhna (violence) atanga mihring zalentir turin Isua hi khawvelah a lo kal a ni tih uar takin a sawi a. A tuk khua a lo var chuan, “Communist sawrkar a tla a, President Ceasescu pawh man a ni,” tih radio-in a rawn puang mai chuh! Hun rei tak hlau leh thlaphanga lo awm thinte chu hlim em emin kawtthlerah an lâm a. Krismas leh Kumthar pawh hlimtakin an hmang ve ta a ni. Dikna palzut vanga hrehawm taka awpbeha awmte chhanchhuah hi Isua mission, Nazaret Manifesto (Lk 4:18) a ni tih Mizo Kristiante hian engtikah tak hrethiam ve tak ang i maw? 2. Zirtirna aia thuhril kan uar zawk vang: Thuthlung Thar ziaktute hian zirtirna hi an ngai pawimawh hle a. Thuthlung Tharah hian “Zirtir/Zirtirna” tih thu hi vawi 200 chuang kan hmu a ni. Kohhran ding tir pawh kha “Tirhkohte thu zirtir ngaithlaa inpawl khawmin, chhang phel leh tawngtaiin an awmho thin a” (TT 2:42) Jentail zinga chanchin tha a thlen hmasakna ber Suria rama Antiokei khuaah pawh, “Thuhriltu leh zirtirtute an awm” tih Luka chuan a sawi a ni (TT 13:1). Mizoramah hian thuhril kan uar a, zirtir erawh kan ngaihthah a. Hei vang hian Pathian thuhriltu kan ngah a, Pathian thu zirtirtu erawh chu kan nei tlem a ni. Hman deuh khan Evangelical Fellowship of India hruaituten “Expository Sermon” zirna inkhawm Aizawlah an buatsaih a. Expository Sermon chu Bible bung leh chang, thu mal tete leh sentence leh paragraph te a hauhuk kaia sawifiahna a ni. He inkhawm chhimtu hi an tlem hle a. Mi thiamten an zirtir laiin thenkhat an lo muthlu leh ta nghal a. Pastor pakhatin, “Thutak han zirtir cheu ila, in muthlu zel a, khuang a rik veleh chawngkawr ang maiin in lu intun leh he si a,” tia mihlim lâm thinho a zilhnate pawh hei hian min hriatchhuahtir a ni. ‘ Bible zir peih lo chuan a zirtir peih lo va. Zirtir peih lo chuan Kohhran a chawm puitling thei ngai lo. Thusawi thiam ringawt lawm, Bible zirtirna ngaithla peih si lo Kohhran chu rinnaah an puitling thei lo va, an ding nghet thei bawk hek lo. Hei vang hian tawngtai dam thei nia an sawite an pan hut hut thin a nih hi. Mizorama Kohhranhote hian thilmak aiin thutak zirtirna kan mamawh zawk a, thusawi thiam aiin zirtir thiam kan mamawh zawk. Israel fate kha Pathianin thilmak tam tak a hmuhtir a; mahse, Pathian an ring thei chuang tlat lo. Isua zirtirte pawh khan Isua thilmak tih tam tak an hmu a; mahse, an thilmak hmuh chuan Isua kha Pathian a ni tih a rintir thei chuang hauh lo. Heta tang hian thilmak hian rinna a siam lo va, rinnain thilmak a ti zawk thin tih kan hre thei awm e. 3. Kohhran inpumkhat loh vang: Aizawla kan awm tirh chuan kan awmna veng Tuikhuahtlangah chuan Kohhran pawl sawi lovin a veng huapin Krismas leh Kumthar kan hmang thin a. Krismas kan lawmnaah hian hetih laia Mizoram Chief Minister Brig. T. Sailo te lai lai infiamnaah an tel ve dawrh dawrh thin a, a va hlimawm em! Mahse vawiinah chuan khawhar takin kan hun tha liam tawh chu kan thlir vawng vawng ta a ni. Tunah chuan Presbyterian Kohhran te, Baptist Kohhran te, UPC te, Catholic Kohhran te, 7th Day Adventist te, Salvation Army te chu, “Mahni seh seh mual hranah” tiin Pathian pakhat ringtu ni si Krismas leh Kumthar kan lo hmang darh ta nuai a. Khawtlang titi pawh a rual hlei thei tawh lo a nih hi. Ringtute inpumkhatna hi Kohhran neitu Lal Isua chuan a ngai pawimawh em em a, a tawngtainaah pawh “pumkhat an nih theih nan” ( John 17:11 ff) tih hi vawi 4 zet a sawi a ni. A neitu thu awih lo leh engmaha ngai lo Kohhran hi engtin nge thinlung taka kan hlim theih ang? Chhungkaw pa ber a faten a thu an awih loh avanga a thinrim chuan tu chhungkua nge hlim thei ang? Kohhranhote hian Tisa rilru puin Kohhran neitu theihnghilhin keimahni intihhlim kan tum thin a. “Heng zawng zawng chunga thuneihna leh ropuina hi ka pe ang che, ka hnena pek a ni tawh si a, ka duh apiang hnenah ka pe bawk thin a ni,” (Lk 4:6) tia Pathian fapa meuh thlem ngamtu Diabola chuan tisa hlimnate hi min pe thei em em a. Mahse, chatuan hlimna leh lawmna min pek theih loh avangin Krismas leh Camping hlimna chuan a daih rei thei lo a nih hi. Kan sawi darh ta deuh nuai a. I han khai khawm dawn teh ang. Thutak aia rilru phurna kan ngaih pawimawh zawk avangte, Pathian thu kan zir peih loh avangtein rinnaah kan puitling thei lova, kan ding nghet thei lo a ni. Chu bakah Kohhran inthendarh nuaina hian Kristaa hlimna leh lawmna tak min neihtir thei lo va. Hei hian Khawtlang inpumkhatna pawh a nghawng chhe mek a ni. Kohhran neitu Lal Isua Krista thu kan awih hma chuan chatuan daih hlimna leh lawmna kan nei thei ngai lovang. Hawh u, kumin Krismas ah tal hi chuan Kohhran pawl hrang hrangte hian lungrual takin “Krista Ruai” dik tak thehho turin hma i la teh ang u. He thu chhiartu zawng zawng Krismas leh Kumthar chibai ka buk a che u.