ZALEN December 16, 2024 : Vawiin ni khan Mizoram Synod chuan Kum 1936-1954 chhunga Kristian Tlangau bu a, YLA/YMA thubelh ti a YLA/YMA chanchin chhuah tel ve thin chu a hlawm a hmun khata dah khawmin Central YMA hnenah an hlan.

Inhlan a hun hi Rev V.L Luaia Hranleh, Executive Secretary i/c Archives Mizoram Synod in a kaihruai a, Pu Kennedy Lalhmangaiha, Archivist in report pe in, Central YMA in a ma puala chanchinbu a neih hma Kum 1936-1954 chhung khan Kristian Tlangau ah hian YLA/YMA thubelh tiin YMA chanchin chhuah thin a ni a, hengte hi Central YMA in a copy an dil chu Synod Archives Committee chuan rem tiin vawiin hian a hlanna nei thei ta a, a vaiin phek 1524 zet a chhah a ni.

“YLA/YMA thubelh” bu hi Rev Dr. H. Remthanga'n Central YMA General Secretary Prof Malsawmliana hnenah hlanin Kristian Tlangau bu nei kim tura an hmalakna hrang hrang a tarlang bawk.

Central YMA aiawh a thusawitu Prof Malsawmliana General Secretary chuan Synod Archive in uluk taka an lo vawn that YMA chanchin chhui letna atan a tangkai tak tur vawiina hlan a ni chu lawmawm tiin phal taka hlantu Mizoram Synod chungah lawmthu a sawi a, hei hi YMA history tam tak tarlanna pawimawh tak anih avangin YMA tan chuan a hlu tak zet a ni a ti.