Mizoramah chuan thalaite punkhawm tamna ber niin an sawi thin. Khawmpuiah chuan ngaihlut ber, KTP General Conference chu Khawzawlah neih mek a ni a. A kal ten tisa leh thlarau lamah hlawkpui ngei turah ngai ila. Inkhawmpui lai a ni bawk a, lungte leng a, khawnge, tun hma lama conference ka kal chanchin hi kan thaikawi ve ang e. Oneteen nineteen kumah daih a sin: Fiamthua thil rei sawi nan hian ‘Oneteen Nineteen’ an tih fiamthu ang deuh hian ka KTP General Conference kal ve hmasak ber chu 2000 hma lam daih tawh kha a nia. Kum 1999 February 18-21 khan Kawnpui-ah KTP General Conference vawi 45 nghah a ni a. Thupuiah “Tu nge ka tirh ang ”(Isaia 6:8) tih niin Speaker-ah Upa Thangmawizuala a ni. Khang hun lai khan tun lai ai mah hian KTP General Conference kha an ngaihlu zawk em aw ka ti. Kan Conference Hlabu hluia a inziah dan chuan Palai riak lut hi mi 11420 lai an ni a, lehlanga kal hi mi 1202 vel niin vaiin mi 12622 ang an ni. Khang hun lai khan tunlai angin lirthei a awlsam lo va; chuvangin, lehlanga kal pawh an tam lem lo ni awm tak a ni. Chutih rual erawh chuan tunlai ai hian sahawk leh buaipuiawm pawh an tlem deuh zawk hmel. Kan thlen in mawlh kha: Thil chhinchhiah thei dan tha deuh mai hi ka nei a. Chu chu kawng tam takin ka hmang tangkai fo thin a. Mahse, buaithlak deuh mai chu ka hriatreng dan ka hman tangkai theih loh rau rau chuan ka thil tawn ngei tawh pawh nise an han sawichhawn leh pawh hian hriat mumal loh ka nei nual mai. Ka chhinchhiah theihnaah kan thlen inte leh thlengte hming a lo tel lo hlauh mai a. Kan thlen in pa hming kha kan hre chhuak zo ta tlat lo mai a. An nu hming pawh ka hre tawh bawk hek lo va. An fapa, min nel ve em em mai, a hnu lam thlenga phone-a min lo be thin pawh kha kan hrechhuak zo ta miah lo chu a nia leh. Mahse, ka hriatchian ve em em chu kan thleng in pa kha Rural Bank-a thawk a ni tih tih zawng kha a ni mai. In chhawngah kawngpui bul hnaihah khan an awm tih bak chu tunah hian zuk zawng chhuak dawn ila, a hriat pawh ka hre tawh kher lo ang. A thleng kha kan tam a, an felin min thleng hneh hle tih bak chu ka chiang ta bar lo. Ka thlenpuite: Kei chu KTP-a kan branch hruaitu, kan vengah chuan pa fiamthu thiam leh talent nei tha tak mai kha ka zui hlauh mai a, kan thlen inah pawh ka tlangnel phah phian a. Tlangnel viau e ti lo chuan kan mikhualna atang khan hmelhriat chhunzawm tak chu pakhat emaw chauh ka nei a. Chu pawh ka cousin \hiannu a ni a. A bak kha chu tun hnu lamah hian hmu leh mah ila ka hre zui tawh kher lo vang. Tuikual lam mi kha kan thlenpui a, Chaltlang kha an tel ve ta em tih pawh ka chiang lo. Kan thlenin te chhung hnai Thuampui nula zaithiam, a pa Scooter-in a sut tak nu kha a thleng ve a, an tam tehlul nen, chu zawng chu ka hriat ni mai awm e. Kan conference haw hnu khan Aizawl lama mite chu Tuikualah te chaw kan ei khawm leh ngat kha a nia. Mahse, chiang takin tumah ka hre zui ta miah lo hi chu a mak thlawt a ni. Inkhawmpui Minute Mak: Kan thlenpui, U Liankunga (A hming ka hriat chhun, amah chu hmu mah ila ka hre tawh lo ang) khan inkhawm programme zawng zawng kha uluk takin a lo minute thlap mai a. Ani minute dan hi chu ‘Committee minute’ ang a ni ve lova. Hmanah kan thianpa pakhat committee a minute an sawi ang deuhvin a ni thung a. Kan thianpa chuan, “Chairman dar chuti zatah chuan a ding a, minute chuti zat thu a sawi a. Chu mi kha mi chu dar chuti zatah a ding a, minute chuti zat chu thu a sawi,” ti zawnga minute thlap tih ang deuh a ni. Inkhawmnaah khan hun hmangtu din atang khan a sana a lo en a, hun hman dan zawng zawng kha uluk takin an hun hman zat nen a lo chhinchhiah thlap a. Chung chu uluk taka remkhawmin Kristian Thalaiah article ngaihnawm deuhah a lo chhuah leh a ni. Vawiin ni thleng hian inkhawm laia a sana en vut laite kha mi tihrechhuak vang vang thin. Kolkata hmun nuam ber ka hriat phah: Inkhawmpui kal tih takah khan kan inkhawmpui ber awm e. Kan thlen zan atanga a tawp zan thleng khan kan inkhawm zawng zawngah khan kan tel kim vekin ka hria. Kan inkhawmpui chhung khan inkhawmnaah khan (ka hriat danin) vawi khatmah ‘Lal biakna’ kan sawi miah lo, ‘Malsawmna’ a min tintu an awm zel nia. Tun hma lam kha chuan zing karah khan ‘Character study’ hi kan nei thin a. Rev. Dr. Vanlalchhuanawma, tuna kan ATC Principal ni ta hian zirtir laia a thusawite kha ka la hre reng, “Kolkalta khawpui-ah Taxi driver hnenah, ‘Hmun nuam lai berah min hruai rawh u,’ ti ula. Fort William-ah an hruai ngei ngei ang che u,” a tihte chu vawiin ni thleng hian rilruah a awm fo thin. He thu hi William Carey-a chanchin tui tak leh ngaihnawim taka min zirtir laia a sawi kha niin ka hria. Kolkatta hi kan paltlang fo va, Fort William erawh ka la tlawh lo nain hmun nuam tak chu a nih ka beisei. Khawpui kal vawi hnihna: Kum 2000 khan February 17-20 chhungin Zemabawkah Conference kha neih a ni ve thung a. Thupuiah hian “Hma i sawn zel ang u” (Phil 3:16). Speaker-ah hian Rev H. Remthanga a ni ve thung a. Kha mi tum khan lehlangin ka va chhim ve thung a. Ka thianpa nen Inrinniah va chhim turin kan kal a. A hma lamin kan thiante riahchilh an awm avangin kan va bel ve chawt a, tlai chawte kan ei a, nuam kan va ti ve phian a. Ka thianpa, ka kalpui khan ‘Ka riak mai dawn,’ a ti mauh mai a. Min riah san ta daih mai a. Tunlai angin lirthei hi a la tam lovin han behna mai tur nei lo chu bus-in haw a ngai a. Kan unaunu (cousin) te ka hmu a, hawna tur ka neih loh thu kha a lo hria a, mahse a bialpa nen Scooter-in an lo kal a, han beh ve rual a ni si lo va, bus-in ka haw ta a. Zodin thleng chu Bus-in ka chuang haw ve a. Temple atang chuan mahniin kein ka haw thla ve mai a; mahse, thui pawh ka kal hmain Conference a kal thlah haw lam motor-a chuang ve turin min sawm hlauh mai a. Vaivakawn thleng ka chuang a, ka lawm khawp mai a. A tukah chuan a huhovin kan va kal leh a, hemi tum hian chuan Branch angin a huhovin kan kal ta bawk a, nuam pawh ka ti ta phian mai. Khawmpui kal nawmna ber chu zai a tuiin a nuam thei hle hi a ni awm e. Heng Conference ka kalnaah pawh hian zai a tui viau zel a. Lamtualte thleng pha lo mah ila nuam ti takin ka lam ve thin. Tun hnuah chuan kan kumte a lo tam ve deuh ta bawk a, kal leh ila chuan tunhma lam ai kha chuan nuam ka tiin ka hlawkpui zawk ngei ang a, Conference manah lamtual ropui pawh ka thleng ve ngam tawh ngei ang a; mahse, hei kumin chu ka kal rih si lo va, lamtual ropui zawng ka la thleng ve rih lo a nih maw! - Engkima Chawngthu