Aizawl September 4, 2022: Hachhek biala kuhva ching te harsatna tawh chungchangah Joint Group YMA hruaitute chuan Zirtawpni khan Assam Chief Minister Himanta Biswa Sarma chu Guwahati ah hmuin kuhva hralhna chungchanga harsatna awm te sutkian anih dan tur an sawipui.

Hachhek Jt.Group YMA Study Team te hi Leader Vanlalruata Pachuau leh Secretary Lalvenhima Ralte te te an ni a. Assam Chief Minister an hmuhna ah hian Chief Minister Himanta chuan Mizoram farmer-te harsatna a hriatthiam pui zia te a lo sawi bakah Assam state-ah ngei pawh Burma kuhva ro avanga farmer ten harsatna an tawh ve thu te a lo sawi a. Study Team-te nena an in kawm lai hian Mizoram CM Zoramthanga a be nghal a, Delhi-ah Union Home Minister Amit Shah ho a sawi ho a that thu a hrilh nghal a ni.

Assam CM hian Langkaih Group YMA leh Taitesena Group YMA-in kuhva hring hralhna turah hma a lak dawn chuan harsatna siam an tum loh thu leh rem a tih thu a sawi a. Principal Private Secretary to CM (Assam) lo be pawp a, Assam DGP leh YMA in Kuhva leitu tur Marwari an lo biakte leh YMA te nen a rang lama meeting neia hma la turin Study Team-te hi a hrilh a ni.