ZALEN, June 29, 2026: Mizo rapper, huhang ngah em em mai, Lilzo chuan kuhva huan enkawl leh buai em em chungin hla thar a nei dawn hnai a, June thla chhung hian Spotify-ah dah hman a tum.

A hla thar tur hi Awmtea Polymer hnenah recording nei zo tawhin hla thupui (heading) a la nei lo a, ‘ngun taka a ngaihthlak leh hunah hming a nei ang’ tih a sawi. 

Thla khat kal taah mai khan Lilzo hian ‘Ka Ta Ni Lo Tur’ chu single a tichhuakin music video a siam a, a hit thawkhat hle a, YouTube-ah thlirtu nuai nga chuang zet a nei tawh a ni.

A hla thar tur chungchang hi Lilzo chuan lengzem hla pangngai a ni dawn nia sawiin, kawppui nei lote tan hunbi chhiar a muan bik thu leh nun a khawharthlak bik thin dan tar lanna tur niin a sawi.

Lilzo chuan rimawi lamah a rilru zawng zawng a pe hman lo tih sawiin, an chhungkuain Bairabi-a kuhva hmun an siam a enkawl thu a sawi a. Thawhtanniah khan zingah relin Bairabi panin huana hna thawk turin a kal a, thlam sak leh kuhva huan hmunhma enkawla a tul tul buaipui turin a liam thin a ni.

Lo neih emaw, kuhva huan siam emaw a tui em em ngai pawh a ni lo; mahse, kum 2019 khan huan hi a nu nen an siam tan a, “A hlimawm angreng phian a. Tin, nakin huna eizawnna nghet zawk, ka u leh nau, ka fate thlenga an rochun a, sum thawk chhuak thei tur a ni tih hriain theihtawp ka chhuah ve ta a ni,” a ti a. Kar tawp chu Aizawl ai maha Bairabi-a hun a hman tam thu a sawi.

Kuhva huan a enkawl avangin Lilzo hian rimawi lam a hlamchhiah phah chuang lo va, heng thil pahnih hi a kawp reng tho a ni.

New Delhi-a show nei turin Inrinni khan Lilzo hian Aizawl a chhuahsan a, Mizoram pawnah, Imran and Big Daddy Asian Club buatsaihin Pathian zan khan hun a hmang a ni.