Aizawl: Kum 13 kalta chhung khan Mizoramah lirthei chesuala thi mi 890 an awm a, Transport department bultumin naktuk atang hian ram pumah ‘Fimkhurna hapta’ hman a ni leh dawn.
Mizoram Police chhinchhiah danin kum 13 kalta 2006 atanga 2018 inkar chhung khan Mizoramah lirthei chetsualna tum 1196 a thleng a, chetsualna thleng avang hian mi 890 chuan nunna an chan a, hliam 1987 an awm bawk.
Chhinchhiahna atanga a lan danin kum 13 kalta chhung khan kum 2014-ah lirthei chetsualna hi thleng tam berin tum 132 a thleng a, hemi kum hian mi 103 thiin hliam 234 an awm a ni. Nikum 2018 kha lirthei chesual tlem ber kum a ni a, lirthei chetsualna tum 53 chhinchhiah a niin thi 45 leh hliam 30 an awm a ni.
Chhinchhiahna atanga a lan danin motor chesual zingah tlanliam a tam ber a, chetsualna thlen chhan hi zu ruih vang leh tlanchak vang niin an sawi a. Hei bakah hian motor insu vanga thi an tam hle bawk.
Transport department chuan naktuk atanga tan turin fimkhur hapta ‘road safety week’ vawi 30-na an hmang tan leh dawn a, kumin thupui atan hian ‘Lamliana himna hi nun himna a ni’ tih chu hman a ni dawn a. Fimkhur hapta hmanna inkhawm hi naktuk chawhma dar 11 hian Vanapa Hall-ah neih a ni dawn a, Transport Minister TJ Lalnuntluanga chu khuallian a ni ang.