Aizawl : Mizorama damdawi in lian leh pan hlawh ber Civil Hospital Aizawl chuan nikum chhung khan pantu 294299 a nei a, heng zinga 169183 chu a thar (new case) niin a dang 125116 chu inentir nawn leh (old case) an ni.

Civil Hospital Aizawl thawhtute hnen atanga ZALEN thudawn danin nikuma damlo inentir zingah hian Medicine department chu pantu ngah ber an niin inentir hi mi 47,638 an tling a, clinic an neih apianga mi 173 inentir ziah anga chhut a ni. Medicine zawhah hian hmeichhe lam (Gynea & Obst) chu a dawttu niin 26,216 inentir an awm a, Emergency (Casualty) chu pathumna niin pantu 26,042 an awm bawk. 

Nikum chhung vek khan Civil Hospital, Aizawlah hian damlo 11,804 admit an ni a, damlo zai (operation) 12,412 neih a niin naupiang 3,699 an awm a. Nau piang zinga 1,838 chu mipa niin hmeichhia 1,861 an awm bawk a. Nikum chhung vek khan state danga inenkawl tura tirh (refer) damlo 1,936 an awm bawk.