Aizawl March 17, 2024 : Power & Electricity Department-in kum 2024-25 chhunga mipui hnena kawlphetha pekchhuahna atana sum leh pai a mamawh (Aggregate Revenue Requirement) chu vaibelchhe 781.97 nia chhut a ni a. Kumthar atana kawlphetha hman man chungchanga sawiselna nei duhte tan hun hawn chhungin mi pakhat hnen atang chauhin sawiselna (complaint) hi dawn a ni.

Joint Electricity Regulatory Commission (JERC) for Manipur & Mizoram huaihawtin Ningani khan Aijal Club-ah kum thar atana kawlphetha hman man chungchanga sawiselna awmte ngaihthlakna, ‘public hearing’ neih a ni a. He huna P&E department thawktute tar lan danin kumthar atana department sum mamawh ‘ARR’ chu vaibelchhe 781.97 a ni tih sawiin heta tang hian state chhung atanga êng chhit man atanga sum hmuh let tura beisei chu vaibelchhe 433.39 niin state pawna power hralh man atanga sum hmuh let beisei chu vaibelchhe 137.35 a ni.

Kum khat chhunga P&E department-in kawlphetha hman man atanga sum a mamawh vaibelchhe 781.97 atanga a hmuh let tur, vaibelchhe 570.74 (state chhung leh state pawn a hralhna) niin, sum indaih lohna tur hi vaibelchhe 211.23 a ni a, hei hi sawrkar chuan subsidy-in a tumsak dawn niin an sawi.

P&E thawktute sawi danin kum 2024-25 chhung hian power million unit 748.89 hralh tur an nei dawn a, heng zinga MU 544.79 hi state chhunga hralh/hman tur a niin a dang, MU 204.10 hi state pawna hralh tura ruahman a ni.

JERC for Manipur & Mizoram public hearing a neihnaah hian Vanlalruata, Tuikual South hnen atang chiahin complaint a lut a. Vanlalruata hian P&E department-in kumthara thawktute hlawh (employees cost) atan sum dah vaibelchhe 135.59 chu a tam lutuk niin a sawi a. “Manipur chu Mizoram aia mihring leh khua pawh a let thum vela tam a niin thawktu pawh an tam zawk a. Heti chung hian power mamawh tlem zawk leh thawktu pawh awm tlem zawkna Mizoramah hnathawktu hlawh Manipur aia a sang hi pawm a harsa a ni,” a ti.

Hei bakah hian department-in working capital atan vaibelchhe 9.93 an dah chu pawm harsa a tih thu sawiin, “Company emaw, corporation-ah emaw chauh working capital hi dah thin a nih laia sawrkar hnuaia awmin working capital an siam hi a dik lo,” a ti a. Eng chhit man chu mipuiten an pek that laiin department lamin an pe tha lo nia a hriat thu a sawi bawk.

P&E department thawktute chuan hlawh atana sum an dah chu hnathawktute hlawh bakah damdawia inenkawlna senso nen belh vek a ni tih an sawi a. Manipur chuan an state-a hman tur pay commission neiin an hmang a, hei vang hian an hlawh hi a hniam niin an sawi a. Working capital pawh state sawrkar sum senna a nih avang leh commission-in a phalsak ang ngeia dah thin an ni tih an sawi.