ZALEN September 13, 2026 : Geology & Mining Department chuan kum 2025-2026 chhung khan sum Rs. 5,29,95,962 an hmu.

Geology & Mining Department-in sum an hmuhnate hi minor mineral (lung leh balu) atanga hmuh Rs. 4,74,27,317 te, ram chhunga petrol leh gas company-ten an zawnna (petroleum exploration license) atangin Rs. 53,94,945 leh chhiah tenau dang atangin Rs. 1,73,700 te a ni.

Nikum chhunga minor mineral atanga sum hmuh hi lung (quarry) atangin Rs. 4,20,78,884 leh balu (sand) atangin Rs. 53,48,473 te an ni.

Directorate of Geology & Mining annual report 2025-26 tar lan danin leihnuai hausakna zawn hna hi ONGC (Oil & Natural Gas Commission), OIL (Oil India Limited) leh VEDANTA Ltd. ten thawkin ONGC hian February 1, 2012 khan Meiduma lei an verhna atangin gas an hmu chhuak tih an sawi a, hei bak chu hmun dang atangin oil leh gas hmuh chhuah a awm lo niin a tar lang. 

Report chuan Meidum khuaa gas (hydrocarbon) hmuh chhuah hi a tam tawk lo niin a tar lang.

ONGC hian state chhunga ram sq. km 5,340-ah leihnuai hausakna zawn hna hi an thawk a, OIL hian sq. km. 3,213-ah thawkin VEDANTA Ltd. hian Kolasib district hmun thenkhatah hma an la bawk a. Tun thlengin Meidum hmuna hydrocarbon hmuh chhuah bak hmuh dang an la nei lo.

Hetih lai hian Ministry of Coal hnuaia Central Mine Planning & Design Institute, Ranchi hmalakna in Lunglei district-a Rotlang ah lungalhthei zawn hna thawh a ni a. March ni 13,2025 atanga July ni 31,2025 chhung khan leiverh (boreholes) hna hmun 15-ah thawh a niin lei chhung metre 4680 a thuk verh a ni a, lungalhthei (coal) a awm ngei nia hriat a niin mithimate zirchian turin thawn a ni. Hei bakah hian Saitual district a Lamzawl ramah lungalhthei zawn hna hi thawh leh tum a ni bawk.

Kum kalta (2025-2026) chhung vek khan Directorate of Geology & Mining hian Mizoram chhung hmun 52 ah leimkin vanga chhiuatna thleng an endik bawk a. Mizorama leimin leh leikhi chu fur laiin a nasa zual tih sawiin hei hi a chhan ber chu Mizoramin ruah tui a dawn tam vang niin an sawi a. Hei bakah hian hmasawnna hnathawh hrang hrang avangin chhiatna thleng a awm thin tih report ah hian an tarlang bawk. 

Nikum chhunga Directorate of Geology & Mining in leimin leh lei che an endik langsar zual te chu Champhai Vengsang, Chhungte (Champhai), Kawltheihuan Mission veng, Chawnpui Vengthlang, Chanmari West, BCM Biak in Mamte leh Thingfal, Samtlang, Hliappui, Sihphir-Chamdur kawng, CHC Ngopa leh Bualte, Lunglei district te an ni. Hei bakah hian geotechnical investigation hmun 31 ah an nei bawk.