Kum 30 chhunga boxer ropui 10

Admin - Sep 07, 2021

Manny Pacquiao dinhmun a tha ber

Boxing chanchin puangzar tu lian leh rintlak DANZ chuan, 90's atanga tun hun thlenga boxer rothap leh boxing ring chhunga mi ropui bik 10 a thlang chhuak a, chungte chu;
 
10. Saul 'Canelo' Alvarez
    Saul Alvarez hi kum 2000 bawr chho khan boxer lar ber zing ami a ni phak a, boxer huaisen leh hnung tawlh ngailo tia sawi a ni thin. Professional boxing a khelh chhunga a tlawm chhun, 2013-a Floyd Mayweather laka a tlawm hnu khan GGG, Miguel Cotto leh Sergey Kovalev te a hneh leh thei a ni. 
    Kum 31 mi Mexican hi weight division hrang hrang pali-ah world champion a ni thei a, fight tum 59 nei tawhin heng zinga boxer 38 zet chu KO hmanga a hneh te an ni.

9. Evander Holyfield

Holyfield hi 80s, 90s leh 2000s thlenga title kawl thei awmchhun a ni. Mahni weight division-a pa tawh khirh ber pawl niin a hmelma hlun Riddick Bowe, Michael Moorer leh Mike Tyson te tuk zal theitu niin Tyson-a’n a beng a seh sak hnu phei kha chuan hriat a hlawh chho ta  hle a ni. 
    Boxing hi 1984 - 2011 chhung a khel a, a chawlhsan hnuah hman deuh khan exhibition bout a rawn khel leh. WBA, WBC leh IBF-ah te title la kim vek theiin tum 4 zet world heavyweight champion a ni. 'The Real Deal' tia hming lem an vuah sak hian a hun chhungin fighter 57 hmachhawnin mi 44 a hneh a, mi 10 kalah a tlawm ve thung.

8. Lennox Lewis
Kum 20 liam ta 90's bawr chho khan boxer zingah amah chhingzo an awm meuh lo. Holyfield leh Mike Tyson te a rawn hneh hnu phei chuan a lar zual phah hle. Vital Klitschko laka a tlawm hnuah boxing a chawlhsan. 
    Lewis hian 1989-2003 a boxing a khelh chhungin world heavyweight champion tum thum a ni thei a, lineal champion tum 2 a ni bawk. British leh Canada khua leh tui nihna a nei kawp a, 1988 summer Olympic-ah Canada ram aiawha telin gold medal a hnek chhuak ve ngat tawh a ni. 

7. Felix Trinidad
Puerto Rican boxer hi amateur huang hi a hming thanna ber pakhat chu a ni hial awm e. 'Tito' Trinidad tia hriat lar hian kum 1990-2008 thleng khan boxing a luhchilh a, hemi chhung hian weight  class hrang hrang pathumah world champion vawi eng emaw zat a ni thei. Tito hi Puerto Rican boxer zinga lar ber niin national amateur championship-ah tum nga zet a champion hnuah professional huangah a zuang lut chauh a, 1999 khan La Hoya hnehin IBF welterweight champion a ni a, a kum lehah WBC light middleweight title a lain 2001-ah WBA middleweight a la bawk. Fighter 42 hnehin mi 3 lakah a tlawm thung.  

6. Oscar De La Hoya
Weight hrang hrang paruk-ah tum 11 zet world champion ni thei Oscar De La Hoya hi a boxing thiamna sawi nep rual a ni lo. 1992 Barcelona Olympic-a a chet ropui em vanga 'The Golden Boy' an tih phah hial hian boxing a khelh loh hnuah Golden Boy Promotion dinin boxing leh mixed martial arts promoter hna hlawhtling takin a thawk zui. BoxRec ten pound for pound boxer tha an thlan chhuah zingah 29-na hauh phak hian boxer 45 a tum tawh zinga 39 hnehin tum 6 a tlawm a, a hneh zinga mi 30 zet a KO bawk.

5. Pernell Whitaker
Pernell Whitaker hi boxer danglam tak mai a ni a, 1984-2001 thleng boxing a khel a, boxing trainer a ni zui. Weight pali-ah world champion a ni a, The Ring Magazine leh Boxing Writers Association of America ten Fighter of the Year atana an lo thlan tawh Whitaker hian lightweight champion ni rei thei ber record siamin a title tum 6 zet a hum thei. Boxer 46 a hnek zinga 40 hnehin mi 4 lakah a tlawm thung. Kum 2019, July ni 14 khan Virginia Beach-a a kawng kan lai chu motor-in a su hlum a ni. A thih hian kum 55 mi chauh ala ni. 

4. Bernard Hopkins
Bernard Hopkins pawh hi thang hnih lian chhung zet boxing khel thei zingah chuan a lar pawl tak niin weight hrang pahnihah world champion a ni thei. A title hmasa ber turin 1995 khan IBF middleweight kawnghren a hreng a, he titl hi boxer 17 lakah tum 19 zet a hum thei a, a hunlai chuan record a ni nghe nghe. 2001-ah WBA(Super) leh WBC title a la leh a, kum 2004 khan Oscar De La Hoya hnehin WBO title a la leh bawk. Boxer 67 ahmachhawn zinga 55 hnehin mi 32 a KO thei a, mi 8 lakah a tlawm thung.

3. Roy Jones Jr.
90's cho vela boxing ring chhung a hming hriat lar ber pakhat Roy Jones Jr. hi middleweight, super middleweight, light heavyweight leh heavyweight champion thei a ni a, Jones hi a hmachhawn te tana mi tihbaiawm tak hi American leh Russian citizen a ni kawp a, 1989-2018 chhung boxing a khel a ni.

Weight hrang hrang pali-ah world champion a ni a, 1988 summer Olympic-ah silver medal a hlawh chhuak tawh bawk. Boxer 75 zet hmachhawn hmanin fighter 66 hnehin chung zinga 47 te chu KO an ni a, mi 9 lakah a tlawm thung. 

2. Floyd Mayweather Jr.
Boxing chanchin a pound-for-pound fighter tha ber pawl Floyd Mayweather Jr. hi professional huangah a la tlawm ngai lo. Professional huangah ropui takin leng mahse, Atlanta Olympic-ah bronze medal a hnek chhuak hram khan tun hnua a hming ropuina tur engemaw kawng takin a hliah khuh ve deuh awm e.   

Mayweather hian boxer hrat khawkheng tak tak Oscar De La Hoya,Miguel Cotto te bakah Canelo Alvarez hneh thei awmchhun a ni bawk. Fight tum 50 nei tawhin ala chak vek a, a zatve aia tam chu KO hmanga a hneh te an ni bawk. 

1. Manny Pacquiao
Manny Pacquiao hi tunah chuan an ram Philippines-ah politics lam buaipuiin a hmanhlel ve hle a, 2010-2016 chhung khan Sarangani bial aiawh a thlan tlin niin 2016 atang khan senator niin ram rawng a bawl mek a ni. 'PacMan’ hi division riat a world champion thei awmchhun a ni a, tin major world title 12 ngawt a la thei bawk a ni. Hei bakah hian boxer zingah decade li (1990, 2000, 2010 leh 2020) thlenga world championship khel chho thei awmchhun a ni bawk. 

Ropui takin flyweight atangin light middleweight-ah a inlet a, a champion thlengin hneh loh a tawng lo. Pacquiao hian boxer ropui tak tak hmachhawnin a tuk tlawm tam hle a, chung zingah chuan Erik Morales leh Marco Antonio Barrera te a hneh nawn tum phei kha chu boxing hmuhnawm sawi apiangin an sawi tel ve ziah tawh ang. Manny Pacquiao hian fighter 72 hmachhawn tawhin tum 62 chakna a chang a, mi 8 lakah tlawmin mi 2 a inhneh tawkpui a ni. 

Share now