ZALEN Sept 3, 2024; Ailawng khuaa silai siamchawp hmanga inkah chungchangah a kaphlumtu a puh Lallawmkima (43) S/o Lalchhuana Ailawng khua vek chu Ailawng khawtlang chuan an khua rap leh tawh lo turin an hriattir.

Ailawng branch YMA htuaitute hnen atanga ZALEN thudawn danin, kar kalta nilaizan (28.8.2024) dar 9 vel khan Lallawmkima chuan a in chhungah Lalrokima (61) chu pistol siamchawp, maniature .22 hmangin a chalah a kap a,a tukhum lamah silai mu hi a tang a ni. Silaia kah a nih tirh hian Lalrokima hi a chat thla mai lova, Civil Hospital ICU ah enkawl zui niin, nimin (2.9.24) chawhma dar 10:25 khan a boral.

He thil thleng chungchangah hian Lalrokima chhungten Kulikawn police station-ah thubuai an thehlut a, chumi bawhzui chuan Lallawmkima hi man niin, jail-ah dah luh tawh a ni.

He thihna chungchangah hian nizan a Ailawng Village Council leh All NGO’s joint committee meeting chuan Lalrokima (61), S/o Thankhama (L) rawng taka silaia kaphlumtu Lallawmkima(43) S/o Lalchhuana chu na taka an dem thu an sawi a. Dan hmanga a na thei ang ber a hrem a phut a, he thihna avanga tuartu zawng zawngte an tawrhpui thu leh tualthattu rang taka an zawn chhuah avangin police-te chungah lawmthu an sawi.

Ailawng khawtlang joint meeting chuan Lallawmkima S/o Lalchhuana chunga action lak dan tur hetiang hian an rel.

1. Ailawng Branch YMA-in chhiatni fund leh member fee a pe kir ang a, YMA member a nihna a hlihsak ang.

2. A in thiah sak a ni ang a, a hun atan September Ni 4, 2024 (Nilaini) zing dar 7 a ni ang.

3. Ailawng khua atanga hnawhchhuah a ni a, Ailawng ram leilung a rawn rap tawh tur a ni lo.

4. Ailawng khua leh tui a nihna hlihsak a ni a, Ailawng khua leh tui a nihna anga chanvo leh hamthatna a neih theih zawng zawng pawh hlihsak a ni ang.

5. A lo thi a nih pawhin Ailawng thlanmualah phum loh tur a ni.