Aizawl May 4, 2024 : Kuminah Mizoram chu lum hle mah se, kum dang aiin a lum chuang lo a. Tuna khaw lum lumna bak hi a lum belh vak rin a ni lo.

ZALEN-in Science & Technology department thawktute hnen atanga thu a dawn danin kuminah hian an record atanga a lan danin khaw lum ber tum chu April 28, 2024 kha niin hemi ni hian 32°C a kai a, kum dang nen ngaihtuahin khua a lum hran lo tih an sawi.

Science & Technology thawktute chuan India rama sik leh sa lam buaipuitu, India Meteorological Department (IMD) nen pawh an inbepawp reng tih sawiin state thenkhata khaw lum awm (heat wave) ang kha Mizoramah chuan awm turah an dah ve lo tih an sawi a. “Khaw lum hlauhawmah chuan IMD hian heat wave warning a pe thin a, hetiang a thlen dawn chuan ruahmanna siama inralrin a ngai thin a. Mizoram erawh normal temparature an ti a, plan siam ngai zingah min dah ve lo a ni,” an ti.

Hetih lai hian record an lakna hi Aizawl a nih avangin hmun hniam lai deuh - Sairang, Tlabung, Zawlnuam leh hmun thenkhatah chuan hei ai hian khua hi a lum zawk tih an sawi.

Khaw lum leh vawt tehnaah Mizoram chu sang lo mah se a lum chhan chu ramngaw a tlem vang leh hnawng a tam vang nia sawiin, “Mihring pung zelah boruak tidaitu thing kan kit nasa a, kan khawpui nise building a insi thup bawk a. Khaw lum hi kan siam chawp a ni,” tiin Science & Technology department officer pakhat chuan ZALEN a hrilh.

IMD-in India ram chu kum dang aia lum zual tura a tih laiin Mizoram erawh normal turin a dah niin a sawi bawk.

Science & Technology department chhinchhiah danin nikum khan January leh February-ah ruahtui a tla lo a, March atangin a tla a. Kuminah chuan thla tin Mizoramin ruahtui a la dawng a ni.

Ni kum chhung veka khaw vawh ni ber chu January 19 a ni a, hemi ni hian 10°C a ni a, khaw lum ni ber chu April 16 niin hemi nia khaw lum lam chu 33°C a tling a. Chhinchhiahna atanga a lan danin kum 10 kalta (2014-2023) chhunga khaw vawh ni ber chu January 13, 2017 niin hemi nia khaw vawh lam chu 2.7°C a ni a, khaw lum ni ber chu April 13, 2017 niin hemi nia khaw lum lam chu 36.5°C a tling bawk.

Tunlai hian Tlabung leh a chhehvel chu khawlum lam tehna ah degree celcius 40 a kai chho deuh reng a, Zawlnuam leh a chhehvel chu 34 degree celcius a kai a, Vairengte leh Sairang pawh 34/35 degree celcius te a kai thin niin an sawi.