Aizawl : Kum nga kalta April thla chinah kumin hi ruah tui tlak chhiat ber tum a ni a, chuti chungin kum dang zawng aiin khua lum tehnaa chuan a la hniam ber kum a ni thung. 

State Meteorological Centre, Directorate of Science and Technology chhinchhiah danin, kumina khaw lum lai berin 33.5°C a ni a, April 24, 26 leh 27 khan hetiang zat degree hi a hawlh. Kum nga kalta chhunga khaw lum ni ber chu April 13, 2017 niin, hemi ni hian 36.5°C a tling a, kum 10 kalta chhung khan tum 7 ngawt April thlaah hian khawlum ni ber hi a thleng a, 2010 khan March 25 chu hemi kuma khaw lum ni ber niin 34.1°C a kai a, 2011 khan September-ah kum khata khaw lum ni ber thlengin 33.2°C a ni a, 2019 khan khaw lum ni ber hi May 13-ah thlengin hemi ni hian 36.0°C zetin a lum a, kum dangah hi chuan kum khata khaw lum ber ni hi April-ah a thleng ziah.

Kum 2021-ah hian khaw vawh lai berin 9°C a ni a, January 17, 23 leh 25 bakah February 6, 4, 6-10 ah te a thleng. Kum nga kalta chhung khan a vawh lai berin 2.7°C a ni a, January 13, 2017 khan he hun hi a thleng. Kumin hi a vawh lai ber hun atanga teh chuan temperature a tlak hniam loh ber kum a ni rih. Kum nga kalta chhung khan January-ah khaw vawh ber hun hi a thleng tlangpui a, 2019 kha chuan December 22-ah kum khata a vawh lai ber hun a thleng hnung.

India Meteorological Department (IMD) in fur (June-September) chhunga ruah tui tlak dan tur thlirlawkna (Long Range Forecast for the 2021 Southwest Monsoon Season Rainfall) a tihchhuahah, kumin fur lo thleng turah hian India ram pum ang chuan ruah tui tlak dan pangngai (normal i.e., 96% to 104% of Long Peiord Average)-in a tla tura ngaih a ni a. Mizoram-ah chuan ruah tui tlak dan pangngai pha lo (below normal i.e., 90% to 96% of Long Period Average) tura ngaih a ni.

Mizoram bakah India khaw chhak leh hmar chhak lamah Long Period Average hi 143.83 cm (1438.3 mm) a ni a, IMD thlirlawkna ang chuan kumin fur chhungin Mizoramah 1294.47 mm a\anga 1380.77 mm inkar vel ruah tla tura ngaih a ni.