Aizawl November 29, 2022 : Thorang bial fanga zin mek bialtu MLA Zodintluanga chuan, "Kum li kal ta chhung khan Chief Minister thusawi engmah tih hlawhtlin a awm lo a," a ti a. Congress sawrkar laiin Mizoramin hmasawnna hmel nasa tak a hmuh thin thu a sawi a, a tluk an awm ngai lo a ti bawk.

Marpara leh New Sachan-a thu a sawinaah CLP Leader Zodintluanga chuan, "Mau/Raw chin duh zawk vanga IAS hna bansan an la awm lo mai ni lovin, tun kum li chhung hian Mau/Raw hmun nei thar leh tuipui thar pawh an awm hriat a ni lo. 'Aizawl chu traffic jam awm lohna khawpuiah kan siam dawn e,' a ti a. COVID-19 hri len vanga Lockdown puan a nih lai kha Traffic jam awm lohna khawpui kan nih teuh ber lai a ni. Congress Sawrkarin a Aizawl khawpui mil tawk two wheeler tax permit kan pek laiin, MNF sawrkar chuan eizawnnaa hmangtute dinhmun en lovin a sang tel permit an pe a ni," a ti.

CM thusawi a hlawhtling thei lo chu beidawn thlak a tling tawh tih sawiin, Zodintluanga MLA chuan, "Kawng chhawng leh lei verh pawh kan Chief Minister hian a tuipui hle a, kan CM suangtuahna mipui hmaa a puan chhuah zung zung ang hi hlawhtling nghal zel thei se chuan Mizoram hi nasa taka hma kan sawn theih a rinawm. Chief Minister ber thusawi engmah tih hlawhtlin a la awm lo hi a beidawn thlak hle a ni," a ti.

Zodintluanga chuan, "MNF sawrkarin hmasawnna ruhrel a hluihhlawn tawh tam tak zingah Tuirial HEP pawh Congress sawrkarin a din tha leh vek a. Falkawn  Referral Hospital ar vulhna atan te-a an hman mai mai tawh pawh, Medical College hialah a hlangkai a. Sport lamah hmasawnna nasa tak a thlen bawk a ni," a ti. "Tih dik tawk loh pawh tam tak kan nei thei a, chung kan thil tih dik tawk loah te chuan Mizoram mipui hnenah ngaihdam ka dil a ni," a ti bawk.

Zodintluanga chuan a bial chhungah hmasawnna kawng hrang hranga an hmuh chhoh mek laiin, tun kum  kalta chhung hian MNF sawrkar atangin hmasawnna hmuh tur pakhatmah a awm loh thu a sawi a. Tuisenchhuaha MNF mi leh sa ten Health Sub-Centre cheng nuai sarih senga ban kar kat chauh an sak zawm phei chu a taka hmuh a zahthlakin rilru a na hle a ni, a ti bawk.

Zodintluanga chuan a bial chhungkaw tam zawkah NLUP dawng lo an awm loh thu leh PMAY chungchang sawiin, "MNF sawrkarah hi chuan thingtlang khaw kilkhawr zawk chu sawi loh, khawpui zawlah pawh MNF sawrkar hnua hmasawnna hmel hmuh tur a awm meuh lo. PMAY hmanga miharsate in sakna tur kum li kal ta a kan thehluh kha tun hnaiah a lo chhuak chauh a. Congress sawrkar lai chuan kum tin in sak thar tur kan thlang thin. PMAY hi Congress sawrkarin kan duan central-in an 'approve' vek tawh a ni a, tuman an ti danglam thei lo, Congress nih vanga in la la lo a nih chuan min hrilh ula hma kan lo la ang," tiin a sawi.