Aizawl September 1, 2024 : Comptroller & Auditor General (CAG) of India report tar lan danin Mizoram Gross State Domestic Product (GSDP) chu kum nga chhungin 17.99%-in a pung niin a tar lang.

Assembly session neih zawh taka State Finances Audit report 2022-2023 pharh taka tar lan a nih danin GSDP thanna hi kum 2018-2023 chhung hian -4.27% atangin 17.99%-ah a kai chho niin a tar lang a, hemi hun chhunga GSDP a chhiat lai ber chu kum 2020-2021 kha niin 4.27% a ni a, kum 2022-2023-ah chuan 17.99%-ah a kai chho niin a tar lang.

Hetih lai hian kum nga hun chhung vek hian agriculture leh industry sector-ah erawh GSDP hi a tlahniam thung a. Agriculture sector-ah 2018-19-ah 12.35% a nih laiin 2022-23-ah erawh chuan 6.89% a ni thung a; industry sector-ah pawh 15.90% atangin 14.14%-ah a tlahniam bawk.

Sum hmuhna lamah pawh hmasawnna a awm nia tar langin CAG report chuan kum 2022-23 chhung hian revenue receipts-ah vbc 10,282.06 hmuh a ni tiin kum hmasa lama sum hmuh vbc 9,159.74 aiin 12.25%-in a tam tih a sawi a. State own tax revenue pawh kum hmasa aia vbc 247.88 (29.02%)-a hmu tamin non tax revenue-ah pawh kum hmasa aiin vbc 405.56 (65.20%) a tam hmuh a ni.

Hei bakah hian State share of Union taxes ah pawh kum hmasa aiin vbc 522.39 (12.37%) a hmu tamin hetih lai hian sawrkar laipui atanga puihna grants-in-aid ah erawh chuan vbc 53.66 (1.55%) in a hmu tlem zawk thung a ni. Hmasawnna hnathawhna (capital expenditure) pawh kum hmasa (2021-22) ah vbc 1,004.38 hman anih laiin 2022-23 ah chuan vbc 1,321.86 hman a ni a, kum hmasa aiin vbc 317.48 (31.61%) in a pung a ni.

Report tarlan danin kum 2022-23 chhung hian sawrkar laipui atangin State disaster response funf (SDRF) ah vbc 39.20 a dawng a, hetih lai hian state in a tum ve tur vbc 4.36 chu pek a ni lo a. State disaster mitigation fund-ah pawh sawrkar laipui atanga vbc 15.89 dawn anih aliin state sawrkar tum ve tur vbc 1.59 chu pek a ni lo bawk.

Audit leh a chhehvel

1. CAG report hi August 21, 2024 khan Mizoram Legislative Assembly session-ah pharh a ni.

2. Mizoram Building & Other Construction Workers Welfare Board (MBOCWWB)-a sum awm zat chu vbc 70.23 a ni.

3. State leiba chu kum 2021-22-ah vbc 10,570.93 a nih laiin 2022-23-ah chuan 10,972.49-ah a pung.

4. March 31, 2023 thleng khan Public Financial Management System (PFMS)-ah single nodal agencies bank account 22 thlunzawm tawh a ni.

5. Mizoram sawrkar hnuaiah Drawing & Disbursement Officer (DDO) 1,170 an awm mek.

6. Principal Accountant General, Mizoram chuan Autonomous District Council pathum leh sawrkar hnuai (govt. body) pakhat atangin kum nga kalta chhunga an sum hman dan enfiahna tur chu September 30, 2023 thlengin a la dawng lo.