Aizawl August 25, 2024 : Kum 5 kalta 2019-2020 atanga 2023-2024 chhungin Mizoram pawna damlo inenkawl tura tirhchhuah ‘refer’ mi 8,972 an awm a. Damlo refer zingah hian cancer natna vei an tam ber.

Assembly session neih zawh taka Aizawl West III bialtu MLA VL Zaithanzama zawhna ziaka chhangin Health & Family Welfare Minister Lalrinpuii chuan state pawna inenkawl tura kal damlo refer hi kum 2019-20-ah 3,125, 2020-21-ah 636, 2021-22-ah 1,246, 2022-23-ah 2,019 leh 2023-24-ah 1,946 te an ni tih a sawi.

Health minister chuan, “Damlote hi India ram hmun hrang hranga Mizoram sawrkar empanelled hospital-ah te refer thin an ni,” a ti a. Damlo refer an tlem zawk theih nan sawrkar chuan doctor-te thiamna sang zawk zir tura tih te, nurse leh paramedical staff te thiamna sang zawk zir tura tirh te, damlo enna khawl lei belh bakah hospital building sak that leh tihchangtlunte an ni tih a sawi.

Assembly zawhna atanga a lan danin health care bill ba la pek tlak loh mi 2,921 awmin an bill tlingkhawm hi Rs. 9,84,01,754 a ni a, pawisa hi sum awm ve leh pek tum a ni a. Health care scheme thar duan mek a ni a, peih fel tep a ni a. Hei bakah hian sawrkar chuan medical reimbursement sum Rs. 29,27,33,777 bat a la nei bawk.