ZALEN November 3, 2024 : Aizawl khawpuiah kum sarih chhung lirthei intlanchhawk kalpui a ni tawh a, tihtawp tumna a la awm lo. Hetihlai hian tun dinhmuna Mizorama lirthei awm zat chu 3,20,404 a tling tawh.

Aizawla lirthei intlanchhawk kalpui mek hi October 2, 2017 atanga kalpui tan niin, lirthei number tawp ber zel chu calendar ni nen a inrual hunah an ding thin.

Tuna hman mek intlanchhawk dan hi June, 2019 atanga hman niin lirthei number tawpa 1&2 te Thawhtanniah an ding a, number 3&4-te Thawhlehniah, 5&6-te Nilainiah, 7&8-te Ninganiah dingin 9&0-te Zirtawpniah an ding thin a. Inrinni leh Pathianniah chuan lirthei vai tlan theih a ni.

Private leh sawrkar motorte bakah, taxi (two wheeler/four wheeler) leh city bus te an intlanchhawk mek bawk.

Taxi (four wheeler)-te hi March 1, 2016 atangin sticker A, B, C-ah thenin an intlanchhawk tan a, two wheeler taxi-te January, 2023 atangin sticker A, B, C hmangin an intlanchhawk bawk.

City bus pawh tunah hian hmun ruka thena hmun khat zel ni khatah an ding mek bawk a, city bus-te hi kum 2010 hma lam atanga intlanchhawk tawh niin tun thlengin city bus bik hi chu anmahni ruahmanna ang zelin an intlanchhawk.

Lirthei intlanchhawk kalpui a nih mek lai hian Mizoramah lirthei a pung mek zel bawk a. October 31, 2024 thlenga Mizorama lirthei awm zat chu 3,20,404 a tling tawh a, chung zinga 2,19,952-te chu motor cycle/scooter niin, car 53,260 a awm tawh.