Aizawl January 26, 2025 : Aizawl Municipal Corporation (AMC) area-ah kum sarih kalta (2018-2024) chhungin lirthei chesual vangin mi 107 an thi a, hliam 125 an awm bawk.

Superintendent of Police, Traffic Aizawl chhinchhiah danin AMC huam chhungah hian kum 2018 khan lirthei chetsualna tum 12 thlengin mihring thi leh hliam pasarih ve ve an awm a. Kum 2019-ah lirthei chetsualna tum 19 thlengin thi 13 leh hliam 18 an awm a, kum 2020-ah chetsualna tum 18 thlengin thi 14 leh hliam 15 an awm bawk a.

Kum 2021-ah lirthei chetsualna tum 12 thlengin thi pariat leh hliam an awm a, kum 2022-ah lirthei chesual 37 awmin mihring thi 23 leh hliam 34 an awm leh a. Kum 2023 khan lirthei chetsualna tum 22 thleng lehin thi 16 leh hliam 22 an awm a, nikum khan lirthei chetsualna hi tum 26 awmin thi 26 leh hliam 15 an awm a ni.

Aizawl City Traffic Police-te hian nikum chhung khan lirthei dan bawhchhia 1,05,832 manin an pawisa chawi tlingkhawm chu Rs. 7,310,602 a tling.

Lirthei dan bawhchhe zingah two wheeler tam berin 7,252 man a ni a, LMV chuan dawtin 2,104 man an ni a. Lirthei dan bawhchhe dangte chu taxi 403, HMV 356, bus 48, MMV 43 leh a dang panga te an ni.

Nikum chhung veka lirthei khalhtuten dan an bawhchhiat tam ber chu MV rules bawhchhia an ni a, a hmun lova lirthei dah (no parking) leh no turining te chu a tam zual an ni.