ZALEN, January 14, 2026: Mana Motors chuan kum thar lawm nan Mahindra XUV 7XO an tlangzarh a, thla khat chhunga lirthei an hralh tam ber an hman zawh chiah bawk avangin beiseina leh phurna an nei sang hle.

Nilaini chawhnuah an showroom, Bawngkawn, Aizawlah Transports Department Director Er R. Lalrammawia’n Mizorama hralh chhuah turin a khuh hawng a, Mizo mipuiin car tha neih an phu a, chutiang car a tlangzarh theih avangin lawmawm a tihzia a sawi.

Kum 2025 chhunga India rama passenger car hralh hnem ber dawttu, Mahindra chuan XUV 7OO thuam thain a hming an thlak a, January 5 khan XUV 7XO an tlangzarh tawh bawk a, ni kua hnuah Mizoramah pho chhuah a ni ve leh ta a ni.

August, 2021 khan XUV 7OO tlangzarh a ni a, Mahindra-in an hlawhtlinpui viau a, December, 2025 thlengin 3,32,000 chuang an hralh hman a. Mana Motors Dealer Principal Dr Franklin Lalrinngheta chuan tuna an tlangzarh, XUV 7XO hi 7OO thlakna a nih thu sawiin tha, him leh chuan nuam leh zual tura siam a ni a, chhungkaw lirthei tha tak a nih a beisei tih a sawi.

Dr Marina hian December, 2025-ah hnuhma chhinchhiahtlak an hnutchhiah zo chiah tih sawiin, “Thla liam taah car 217 kan hralh a, Mana Motors a din hnua thla khat chhunga kan hralh hnem ber a ni a. Car pakhat cheng nuai 10 chuang deuh vek a ni a, kan lawm hle a ni,” a ti.

XUV 7XO hi chi ruk awmin rawng chi sarih a awm bawk a. Petrol engine 2.0 litre niin a man tlawm ber (on-road price) Rs nuai 15.49 niin a to ber Rs nuai 24.91-in a lei theih a. Diesel engine 2.2 litre niin a man tlawm ber Rs nuai 16.91 niin a to ber Rs nuai 25.66 a ni ve thung.

Transports director chuan Mana Motors chu lirthei an hralh chhuah hnuah enkawl zui lamah Mizorama tha ber pawl an nih thu a sawi a, an department kaihhnawih sawi telin mipui awlsam nan tan theihtawp an chhuah a, mipuiin harsatna an nei a nih chuan hrilh hreh lo turin a ngen.

An department-ah dan ang taka lirthei ziah luh nuai 3.5 chuang hret a awm laiin a huna chhiah pek loh avanga document fel fai lo 88,000 chuang an awm a, “Mizoten lirthei kan lei rualin chhiah kan lei tel tih kan hriat a ngai hle a ni,” a ti.