SPortskeeda chuan kum zabi 21 chhunga football striker tha panga a thlan chhuah zingah Brazilian Ronaldo Nazario a dah chungnung ber. 

21st Century-ah hian footballer tha leh ropui chin chu an awm deuh vek a, an thiam leh theihna a inang loh hlawm em avangin thlan chhuah thiam pawh a har viauin a rinawm. Heng striker thlan chhuah te hian khawvel football inelna ngaihhlut World Cup, UEFA Champions League leh an khelhna  League trophy an chawi nual hlawm bakah mimal chawimawina pawh an dawng nual hlawm a ni.                

Heng thlan chhuah te hi striker (number 9 role play thin) bik chauh an nih avangin winger leh position danga tha leh goal khung thei tak tak te kha an tel lo tih hriat tur a ni. 
1. Ronaldo Nazario: Ronaldo Luís Nazário de Lima hi Brazilian Portuguese niin kum 1976,  September 18 khan a piang a, a vanglai chuan Ronaldo tia hriat lar a ni. Tunah chuan sumdawnna lam luhchilhin,  La Liga club Real Valladolid, president a ni bawk. 

Football a khelh chhungin striker ball thiam leh tlan chak em em a ni a, sport writer hovin a hming lemah "The Phenomenon" an phuah sak hial. Khawvel footballer ropui sawi chhuah changin a hming a dai ngai tawh lovang. Brazil tan tum 98 khelin goal 62 a thun. 

Striker, mahni awmhmuna ball nghak mai lovin ball zawng thin ani, a goal thun zingah amah leh amah ball insiam chawpa tih goal a ngah hle bawk. FIFA World Player of the Year-ah tum thum thlan a ni a, Ballon d'Or award vawihnih a dawng bawk. Khawvel foolballer tha ber nihna vawi 5 a dawng tihna a nih chu. 

2. Thierry Henry: Thierry Daniel Henry, kum 44 Frence khua lehtui hian football khelh a chawlhsan hnuah coach hna a thawk chhunzawm. 

Midumin ball an thiam lo tih dawt a chantir theitu striker hi khawvel-a striker tha ber pawl a ni thin. Premier League lamah phei chuan player ropui ber zing ami a ni. Kum 2003 leh 2004, FIFA World Player of the Year thlannaah Henry hi pahnihna a ni a, a kum leh Ballon d'Or-ah pawh pahnihna bawk a ni. A hunlai hi Ronaldo, Zidane leh Ronaldinho te vanglai nen a innan chhoh avangin a hming hi a langsar thei lova ngaih a ni. 

PFA Players' Player of the Year atan vawi hnih, FWA Footballer of the Year-ah vawi 3 leh PFA Team of the Year-ah a zawnin tum 6 thlan a ni bawk. UEFA Team of the Year atan tum 5 thlan a ni bawk. Henry hian Football trophy hrawl deuh chu a chawi nual a, chung zingah chuan World Cup, European Championship, UEFA Champions League, Premier League leh La Liga te a tel a ni. 

3. Luis Suarez: Uruguayan professional footballer Luis Alberto Suárez Díaz  hi kum 34-na a hmang mekin Spanish club tha Atletico Madrid leh Uruguay national team tan striker a ni mek. 

Khawvel striker tha sawi changa hmaih tawh loh tur Suárez hian a career-ah trophy 19 a chawi tawh a, chung zingah chuan league title 6, UEFA Champions League title leh Copa América te an tel. 

Suárez hian European Golden Shoes, Eredivisie Golden Boot, Premier League Golden Boot leh Pichichi Trophy chawimawina dawng tawhin ram leh club tan goal 500 zet a thun tawh. 
Europe clubs tha Ajax, Liverpool, FC Barcelona leh Atletico Madrid a khel kual tawh.

4.Robert Lewandowski:  Polish Robert Lewandowski hi ni 21 August, 1988 khan a piang a, Polish professional footballer hian tunah a vanglai a hmang mek a, khawvel striker hlauhawm ber pawl ni mekin Bundesliga club Bayern Munich tana goal thun khawl ni mekin a ram Poland national team-ah captain a ni mek bawk. 

A technique ropui leh a finishing that em vang hian khawvel striker tha ber zingah a chhiar tel loh theih loh. Bundesliga chanchina player tha tia sawi a ni. Club leh ram tan goal  500 chuang zet a thun tawh. 

Robert Lewandowski hi a vanduai hle a, 2019/20 season-a Ballom d’Or dawng tura rinkai ber pakhat nimahse, Covid 19 hrileng avangin Ballom d’Or Award hi sem a ni ta lo. Tun season Bundesliga khelh mekah  game 25 khel tawhin goal 35 a khung tling der tawh. Shot hi 91 neiin goal zawnah vawi 52 zet a kal bawk. Bundesliga lamah record thar a siam a rinawm hle. 

5. Sergio Aguero: Kum 33 mi Sergio Leonel Agüero del Castillo hi Premier League club Manchester City leh Argentina national team tan a khel mek a. A naupan laia a hming lem "Kun" tih ziahna kawr a ha vang thin. He hming lem hi a naupan laia cartoon lar Kum-Kum tih charecter pakhat atanga pu tan a ni. 

A hunlai leh Premier League-a  striker ropui sawi changa hming dai tawhlo tur a ni. A ram aiawhin kum 2006 atang khan koh tan a ni a, game 97 khel tawhin goal 41 zet a thun tawh a ni. Goal khung kawnga skill ropui neitu hian Atletico Madrid leh Manchester City tan a thawh hlawk thei hle. Tun season tawp hian City hi a chhuahsan dawn a, a kalna tur erawh ala tichiang lo thung.