December 15, 2022; Aizawl District Court-a Special Judge, (Prevention of Corruption Act) chuan kumin 2022 chhungin ‘eiruk thubuai’hrang hrang 5-ah mi 19 thiam loh chantir a nei tawh. Thubuai remna a siam thar ber vawiin ah Serkhan-Bagha road siamna a sum eirukna thubuai ah PWD E-in-C hlui pahnih, Liansanga (Kum 5 tang tur leh Rs. Nuai 40 chawi tur) leh Lianchungnunga (kum 4 tang tur leh Rs. Nuai 20 chawi tur) te chu pawisa leh jail tang tura hrem an ni.

Dr. HTC. Lalrinchhana, Special Judge, Prevention of Corruption chuan vawiin December ni 15, 2022 khan Serkhan - Bagha road siamna a sum eiru a puh thiam loh a chantir, PWD E-in-C hlui Liansanga chu kum 5 leh Rs. Nuai 40  chawi turin a hrem a, E-in-C hlui tho Lianchungnunga pawh kum 4 tang tur leh Rs. Nuai 20 chawi turin a hrem.

Vawiin December ni 15 khan Special Judge (PC Act) in hremna a puan lai hian E-in-C hlui pahnihte hi court ah an awm lo a, Court lock up ah dah an ni. Court thuremna hi bail theih a nih loh avangin vawiin tlai lamah central jail ah dah an ni ang. E-in-C hlui pahnihte ukil te chuan High Court ah kalpui zui zel an tum tih an sawi.

Kumin 2022 chhungin Aizawl District Court-a Special Judge, (Prevention of Corruption Act) in eiruk thubuai hrang hrang 5 ah mi 19 thiam loh a chantir tawh a, chungte chu Kau-Tlabung leh Tuipanglui Mini Hydel Project (MHP) siamnaa sum tihchingpen thubuai pahnihte, CADC a Rs. nuai 137 tih chingpen thubuai, MAMCO a contract leh supply pek tiam a, thamna lak chungchang leh Serkhan - Bagha road siamna a sum eirukna thubuaite a ni.