ZALEN December 10, 2023 : Tanhril, Setlak ram atanga Aizawl khawpui chawmtu tur, Greater Aizawl Water Supply Scheme Phase III chu hman theih tura peih ni tawh mah se tui pump a la ni lo a, kumin chhung hian pump hman ngei beisei a ni.

ZALEN-in Public Health Engineering department thawktute hnen atanga thu a dawn danin phase III atang hian diesel hmang chuan tui hi pump theih ni tawh mah se senso a tam avangin hman a ni lo a. Senso tlem zawk, electric hmangin tui hi pump thuai tum a ni tih an sawi.

PHE Chief Engineer Er. Lalrothanga chuan, “Tui pump-na tur power sub station pahnih pawh peih a ni tawh a. PHE-in eng emaw bill pek theih loh palha kan thla thum power hman man tur security vaibelchhe 5 pawh treasury-ah a awm tawh bawk a. He pawisa hi power department kuta a luh veleh commission a ni tawh dawn a. PHE lam chu kan inring reng tawh,” a ti.

Diesel hmanga tui pump chu a hautak tih sawiin, “Ni tin diesel hmanga tui pump tur chuan a hautak lutuk a. Electric hmanga tui kan pump theih chuan a senso a tlem dawn a, diesel hi chu eng emaw thlaveng (stand by)-ah chauh kan hmang dawn a ni,” a ti bawk.

Er. Lalrothanga chuan tuna phase III chu peih a nih chuan Aizawl khawpui chuan kum 2033 thleng mihring 4,45,000-ten hnianghnarin tui a hmu thei dawn nia sawiin harsatna a awmte a nih loh chuan mi pakhatin ni tin tui litre 135 hmu thei tura chhut a ni tih a sawi.

Tui put (pipe leak) awm thin chungchangah hmalak an tum tih sawi bawkin, “Phone kan dawn leh social media lama kan hmuh chuan hma kan la vat thin a. Mipui lamin man chawi lova an biakpawhna tur toll free telephone pawh siam tumin hma kan la mek a, helam buapuitu tur team pawh siam kan rilruk bawk a ni,” a ti bawk.

37 mld Water Treatment Plant hi diesel engine hmangin September 22-24, 2023 chhung khan trial run neih a ni a. September 26, 2023 khan Deputy Chief Minister Tawnluia chuan khuallian niin a hawng a ni.

Phase III hi SIPMIU leh UD&PA Department chuan kum 2016 atang khan bul an tan a. Setlak atang hian Laipuitlang zem lianah tui hi pipe lian tak, feet hnih leh a chanve hawlhtlanga lian, kilometer 11 zeta thui hmanga pump chhoh a ni.

GAWSS phase I hi mi 80,000 chawm zo tura duan a niin kum 1988 khan hawn a ni a, ni tin tui litre maktaduai 10.8 pump thei tura duan a ni a. GAWSS phase II hi kum 2007 khan hawn a niin ni tin litre maktaduai 24 pump thei tur leh mi 3,10,000 chawm zo tura duan a ni.