ZALEN December 17, 2023 : Mizoram police chhinchhiah danin kumin January atanga October thleng khan lirthei chetsualna avanga thi Mizoramah mi 77 an awm tawh.

Mizoram police chhinchhiah danin thla 10 kal ta chhung khan lirthei chetsualna tum 86 a thleng tawh a, heng zingah 64 hi thihna thleng chetsualna a ni a, hliam na tak tuar awmna 11, hliam tenau tuar awmna pali leh hliam awm lohna pasarih te an ni.

Lirthei chetsualna avang hian hliam na tak tuar mi 35 an awm a, hliam tenau tuar 67 awmin thi mi 77 nen an vaia harsatna tawk hi mi 179 an tling a. Sawrkar record phak loh leh hriat loh accident thleng pawh thahnem tak a awm nia hriat a ni.

Aizawl traffic police-ten an huam chhung, AMC area-ah January atanga October, 2023 thlenga lirthei an man zawng zawng chu 13,836 a ni a, an pawisa chawitir tling khawm hi Rs. 99,66,612 a tling.

Lirthei dan bawhchhia zingah hian two wheeler tam ber hi 9,618 man an ni a, LMV chuan dawtin 3,069 man an ni.

Kum 2023 chhunga dan bawhchhiatna langsar zualte chu a hmun lova lirthei dah (no parking) 2,464, no entry 1,147 leh wrong side traffic 956 te chu a langsra zual te an ni.

Kum 2022 chhunga lirthei dan bawhchhia police ten an man zawng zawng chu 18,334 zet a tling a, an pawisa chawi tling khawm hi Rs. 82,70,000/- a tling a ni. Lirthei dan bawhchhe zingah two wheeler an tam ber a, LMV leh taxi ten an dawt a ni. Kum 2022 chhunga lirthei dan bawhchhiatna langsar zualte chu a hmun lova lirthei dah (no parking), no entry leh wrong side traffic te an ni.

Mi thiamten an chhut dan chuan India rama motor accident thleng thin 75% chu a khalhtu fimkhur tawk loh vanga thleng thin a ni a, a dang zawng chu kawngpui that tawk loh vang te, kawng hmang vetu (other road users) te leh thil dang vanga thleng thin a ni.

National Crime Record Bureau (NCRB) in kum 2022 chhunga India ram Road Traffic Accident Data a tichhuahah chuan India ramah kum 2022 chhungin lirthei accident vawi 4,61,312 zet a thleng a, mi 1,68,491 (mipa-1,45,177, hmeichhia-23,314) zet thiin ni tin mi 462 thi ziah ang a ni.