ZALEN December 17, 2023 : Champhai Winery atangin kumin, 2023-ah grape wine (Champ Wine) case 4,360 siamchhuah tawh a ni a, wine-a la siam loh litre 2,50,000 winery-ah a la awm mek bawk.

Champhai Grape Growers’ Society hruaitute hnen atanga ZALEN thudawn danin, grape atanga siam chhuah grape wine-te chu sawrkar ruahmanna anga zawrh chhuah phal a nih hnuah Mizoram hmun hrang hrangah zawrh chhuah mek zel a ni.

Mizoram pumah grape wine zawrh phalna mi 48 hnenah pek an ni a, district mala phalna pek tam ber ber Aizawl bikah mi 19 hnenah pek an awm.

Mizorama winery pahnih, Champhai leh Hnahlan Winery atanga wine siam chhuahte hi sawrkar thupek angin alcohol content 12% aia sang lo tur niin Hnahlan Winery atanga siamchuah, Isabella chu um khat (750ml) chu Rs. 500 a ni a, Champhai Winery-a siam chhuah ‘Champ Wine’ chu um khat Rs. 300 a ni thung.

Mizoram sawrkar chuan grape wine litre khatah excise duty Rs. 10 leh Vat 16% a la mek.

Horticulture department chhinchhiah danin nikum 2022 chhung khan Hnahlanin grape quintal 1,500 tharin Rs. 90,00,000 an lei chhuak a, Champhai leh a chhehvela lo neitu ten quintal 1,244.88 thar bawkin, Rs. 68,69,899 an lei chhuak.

Winery atanga siam chhuah grape wine-te hi Mizoram Baptist Kohhran leh kohhran dang thenkhatten sacrament atan an dawr mek a, hetihlai hian Presbyterian Kohhran erawh chuan an la dawr ve thei rih lo thung.