Aizawl December 9, 2023 : April - December, 2023 inkar chhungin Kolasib District-ah ngawr (TB) vei rinhlelh khak (sputum) endik 1,492 atangin TB vei nem ngheh 144 an awm a. Mi 62 chu enkawl dam tawh niin, enkawl lai 82 an awm a. TB leh HIV vei kawp 14 awmin, TB vei enkawl laia thi pathum an awm bawk.

Kolasib District Task Force on Immunisation (DTFI) leh Kolasib District TB (Tuberculosis) Forum chu Zirtawpni khan an Chairman, Kolasib District Bawrhsap John LT Sanga hovin Kolasib DC Conference Hall-ah an ?hu khawm a. District TB official-te chuan TB hrik en leh damlo enkawlna chu sawrkarah a thlawn vek a nih bakah, Nikshay Poshan Yojna (NPY) hnuaiah damdawi ei chhung zawng thla tin ? 500/- pek an nih thu leh inenkawl zawh hnuah Rs. 750/- pek thin an nih thu sawiin, TB chu enkawl hma a, tha taka damdawi ei chuan a dam hmain, harsatna nasa zawk a pumpelh theih tih an sawi a. Hei bakah hian TB veiten an inenkawl chhunga chaw tha an dawn theih nan mi inphal (Nikshay Mitra)-te hnen atangin tanpuina sum dawn thin a ni bawk a. Tun dinhmunah Kolasib District chhungah Nikshay Mitra (donor) 35 awm mekin, damlo 35 tanpui mek an ni.

Meeting Chairman John LT Sanga chuan hriselna ngaih pawimawh a tul thu sawiin, “Tlang hri leng leh natna tam tak chu fimkhur loh vanga mi dang kai chhawn theih a ni,” a ti a. Hriselna tha nei turin inenkawl uluk a, mahni hriselna dinhmun enfiah thin a pawimawh tiin, “Hriselna leh dam reina chu Pathian malsawmna a nih rualin eng emaw chin chu kan kutah a awm a, mahni inthununna atangin hriselna tihthat theih a ni,” a ti bawk.