Aizawl June 30, 2024 : Kumin hian malaria hri vei an pung nasa hle a. Health department chhinchhiah danin January atanga May thla tawp thleng, thla nga chhunga malaria vei hmuhchhuah zat chu 7,068 an tling tawh a ni.

ZALEN zawhna chhangin health department thawktute chuan malaria chu Mizoram khawthlang lamah a hluar zual niin an sawi a. A bikin Lawngtlai, Lunglei leh Mamit district-ah malaria vei hmuhchhuah an tam zual a. Lawngtlai district-ah hmuhchhuah tam berin thla nga kalta (January to May) chhunga hmuhchhuah zat chu 3,393 an ni a, hei hi kumina malaria hmuhchhuah zawng zawng, 7,068 atanga chhutin 48% a tling phak a ni.

Lunglei district chu malaria kai hmuhchhuah tam ber pahnihna niin mi 1,691-in an vei tih hmuhchhuah a ni a, Mamit district chuan dawt lehin 1,390 hmuhchhuah a ni a. District danga malaria hmuhchhuah dan chu Siaha 551, Aizawl East 13, Aizawl West 11, Serchhip pakua, Kolasib leh Champhai panga ve ve te an ni.

Malaria vei hmuhchhuah zinga 3,645 hi PF an ni a, PV 3,423 awm bawkin malaria vanga thi erawh kumin hian an la awm lo thung.

Health department thawktute chuan Mizoram boruak chu malaria inthlahpunna atana hmun duhthusam anih avangin a pung niin ZALEN an hrilh a. “Ruahtui a tla tha a, a tawk chauhin khua a lum bawk a. Malaria pai thosi inthlahpunna tur tui thianglim tling a tam bawk nen kum 2020 atang khan kum tin mai hri kai hi kan pung chho ta zel a ni,” a ti.

Malaria chu a bik takin Chakma hnam zingah a hluar nia sawiin, “Thosi len zar lovin ramahte an riak a, malaria an rawn vei haw a. Mahse, Covid ang deuh khan engmah an taksaah a lang chhuak (symptoms) a awm bawk si lo a. Heng mite hian an pu darh thin niin kan hria a ni,” a ti.

Health department thawktute chuan kum thar lamah chuan malaria hi a ziaawm an beisei tih sawiin, “Thosi tihremna atana damdawi kan hman thin, DDT kha a thawk tha tawk lo nia kan hriat vangin Delta Mathrin hmangin kan kap a. Thosi len pawh eng emaw zat kan sem bawk a. Nakum lamah chuan a tlakhniam kan beisei hle a ni,” an ti.