Hripui leng avanga hun eng emaw chen an chawlh lailawk hnuah Mizo Idol thlanna chu kuminah buatsaih a ni leh dawn ta. Mizo Idol hi Zonet buatsaiha neih thin a ni a, kuminah pawh anni tho hian an buatsaih leh dawn. Kumin hi a season 7-na tur a ni tawh dawn a, July 19, 2022 atangin tan a ni ang - tel thei chin kum bithliah leh final neih hun tur bakah thil pawimawh dangte hriattur a awm thuai beisei a ni. 

Kum 2018 khan Mizo Idol atan Chanmari veng tlangval Jerry Lalrinawma chu thlan a ni a, hemi hnu hian buatsaih a la ni leh lo. Hripui lengin ziaawm lam a pan chho zel nia a lan avangin sawrkarin inkhuahkhirhna a thlahdul zel a, Mizo Idol thlanna pawh kum thum hnuah buatsaih a ni leh dawn ta a ni - zaimite tan chuan thu lawmawm tak a ni ngei ang.  

Kum 2007 khan a vawi khat nan Mizo Idol thlanna buatsaih a ni a, Lallawmpuia, Champhai chu Idol hmasa ber a ni. Hemi hnu hian - Lalchhanchhuaha (Sumsuih), Lalthuthaa (Siaha), Grace Lalchhanhimi (Kolasib), Rebecca Zorintluangi (Sairang Sihhmui) leh Jerry Lalrinawma, Chanmari, Aizawl te chu Mizo Idol atan thlan an ni tawh bawk.  

Mizo Idol lo ni tawh te
2007 - Lallawmpuia, Champhai
2009 - Lalchhanchhuaha, Sumsuih
2011 - Lalthuthaa, Siaha
2013 - Grace Lalchhanhimi, Kolasib
2015 - Rebecca Zorintluangi, Sairang Sihhmui
2018 - Jerry Lalrinawma, Chanmari, Aizawl