Aizawl: Tunhnaia vawk natna lar tak leh an thihpui nasat em em Porcine Reproductive & Respiratory Syndrome (PRRS) vanga na leh thihpui kumin chhungin an la awm lo a, hetih lai hian PRRS vanga vawk thi Mizoramah 11079 an awm tawh niin a chhinchhiah.
AH&Vety department thawktuten Zalen an hrilh danin PRRS hi kumin bikah hian la nei lo mah se lo inven lawk a ngaih avangin ramdang atanga vawk lakluh khap turin district bawrhsap te an ngen tih an sawi a. Mahse heti chung hian Myanmar lam atangin vawk thenkhat a lo lut nia an hriat thu sawiin tun hma lama PRRS pawh kha khawchhak lam atanga put darh a nih avangin mi tinte fimkhur tura an ngenna ngai pawimawh turin an duh tih an sawi. AH&Vety thawktute chuan classical swine fever chuan Mizoram a chenchilh reng nia sawiin tunlai hian vawk chu vaccine an pe mek tih an sawi a, hetia hma an lak chhan chu invenlawkna atan a ni tih sawiin kum hmasa lama PRRS vanga vawk thite khan swine fever an vei kawp zel a, hetia hma an lo lakna avang hian PRRS pawh leng leh ta se a ziaawm phah dawn niin Zalen an hrilh bawk.
AH&Vety department thawktu chuan kum tin February atanga July thla inkar chu PRRS len duh hunlai niin an sawi a, PRRS natna avang hian kum 2013-ah Vawk damlo 4029 an enfiah atangin cawk 745-te chuan PRRS hi an vei tih hmuh chhuah niin he hri avanga vawk thi 3806 an awm a. Kum 2016-ah vawk damlo enfiah 351 awmin PRRS vei 200 hmuh chhuah an ni a, PRRS avanga vawk thi 4699 an awm bakah nikum khan vawk 4241 enfiah atangin PRRS vei vawk 777 hmuhchhuah a ni a, PRRS avanga thi 2574 an awm a, Mizoramah PRRS vanga vawk thi zawng zawng hi 11079 nia chhinchhiah a ni.