ZALEN January 12, 2025 : Excise & Narcotics Department chhinchhiah danin kumin chhungin damdawi hman sual vanga thi an la awm lo a. Nikum chhung khan damdawi hman sual vangin mi 67 an thi.

Nikum chhunga ruihhlo hman sual vanga thite hi mipa 58 leh hmeichhia pakua an ni a. Ruihhlo ti thinte thihpui tam ber hi heroin a ni a, a bak dang pawh hi heroin leh ruihhlo dang tikawpte an ni.

Excise & Narcotics Department chhinchhiah danin kum 1984 atanga nikum thleng khan Mizoramah ruihhlo vanga thi mi 1,879 an awm tawh a, heng zinga 1,653 chu mipa niin hmeichhia 226 an awm bawk.

Chhinchhiahna atanga a lan danin kum 2004 kha ruihhlo vanga thi an tam ber kum a ni a, hemi kum hian damdawi hman sual vangin mi 143 an thi a ni.