Kum thar 2016 chu kan lo chuang kai leh ta reng mai, kan beisei phak loh leh phu loh a ni a, eng pawh nise, a lawmawm hle mai i ti phawt mai teh ang.?Keini kum chhiar dan atang chuan kum bul kan han tan leh dawn ta a, thufing pakhatah chuan, ‘a bul tan that chu a chanve zo ang a ni,”a ti a, a dik thei viau awm e. Hetih lai hian kan hriat ve reng tur pakhat chu, “Thih thlengin rinawmin lo awm rawh,” tih, Bible-a mi ang deuh khan, a bul kan tan that pawn duh tawk mai lo ila, a tawp thlenga tha taka tluan tling thei turin. Nia, Chung Pathian hian mi tumah duhsak bik a nei lo va, mi te ber atanga lian ber thlengin, hun leh ni leh kum inang theuhin min pe a, chu chu keimahni kutah a dah theuh a ni.?A hmang thiam thiam a ni ber mai awm e. Mihringteah hian mahni inhriat hi a har khawp mai a, mahni hi chu kan indah hmasa a – tha ber, fel ber kan inti deuh zel a ni. Nia, chhungkaw nu ber/pa ber ka ni a,kum kal taa ka chhungkaw enkawl danah te a lungawithlak em, hma lam pan nge kan nih hnungtawlh zawk, hnungtawlh zawkte kan nih chuan tih dik loh lai te zawng ila, tihfel dan te dap tum ta ila. Hma lam pan kan nih pawn tluang taka kal zel thei tura tan lak leh ngaihven a tha hle ang. Kan ni tin eizawnnaah te pawh eng nge kan an, office kal kan nih chuan hunte kan vawng dik thin em, vawn dik ngai loh chuan tun atang chuan vawn dik hram hram han tum ve ta ila. Contract hna thawk thin ka nih pawn kan hna te a tha tawk em, ei neih hnem tum lutuk pawh kha a fuh ber lo thei a ni, mahni ram tana thawk, mahni tan tho a ni, tih kha hre tel ila. Kohhran rawngbawltu ka ni a, kum kal taa ka thawh dan te kha mi dangte tan malsawmna a ni ang em aw? Lo ni ta sela, Chung lam hriatpuina a tel em tihte kha thlir tel zel ila. Awle, kum kal ta lama kan thil tih zawng zawng te atangin mahni kan inhmu thei ang a, chuta tang chuan tu nge ka nih, miten engtinnge min lo hmuh thin,tih te a tlangpui chu a hriat theih ang, tichuan, mahni kan in-correct thei tawh ang a, hmabak duh awm takin min lo hmuak thei tawh ngei ang. Kan ni tin nunah hian harsatna, buaina, manganna te kan tawkin kan nei thin a, thenkhat chuan heng te hi hre thiam lovin kan tal buai mai thin. A ni taka, harsatna hrang hrangten min han chim luai luai mai chuan patling hi a zuai rawih ve theih a ni. Awle, hetih lai kara kan hriat reng tur chu, eng vanga/engtia heng harsatnate hi tawk mai nge ka nih, tih hi a ni. Khawvel awm dan tur chu a ni ngei a; mahse, thenkhat hi chu keimahni insiamchawpte a ni ve hlawm. Entirnan, tunah i sumdawnnaah ilo hek ta nual mai a, kumtluan mai khan tum angin ilo awm thei ta lo va, a van hrehawm em, ti ta ngawih ngawih mai la, a nih loh pawn kan chan tawk a nih hi ti ta then mai la – a hmasa zawkah hi chuan i harsatna tawh kha a thuah hnih tlat mai, a hnu hnung zawkah erawh chuan harsatna pakhat chauh mai pawh ni lovin a fihlim hlauh zawk a ni. Nia, thil kan thlir dan hi a pawimawh hle a, harsatna inang rau rauah pawh a inzangkhai hleih thei hle. Thawhpuite nen emaw, kan unau/nu leh pa, etc, ten eng emaw pawh lo in hmu thiam lo ila,a zang khai duh dan chu mi dangte kha mahni aia tha zawk, fel zawkah pawm thei ila, a nih loh pawn an that thinna lai te kha hetih hunah tak hian va hmuh tum zawk ila, an dik lohna lai, sualna hlir kan hmuh chuan min ti hah tawlh tawlh ve thei a ni,anih loh pawn mahni hi kan lo indah fel/tha viau thin a ni duh hle. Kum hlui lama kan thiltih leh tawn zawng zawng te chu a dik emaw dik lo emaw, a tha emaw thalo emaw kan siam tha thei tawh lo, koh kir theih a ni tawh lo. Chuvang chuan kan hma lam hun la tawn tur te atana in buaitsaih, lo inhmakhua dan dap kha a tha mai awm e. Sawi tawh angin kum bul kan han tan leh ta a, Pathian zarah tluang takin kum kan hmang chho leh thei ngei ang tih ring ila. Chung huna kan thil tawn chhoh leh turte theih ang angin lo thlir lawk han tum dawn ila. Pakhatnaah chuan khel lova kan tawn chhoh thin khuarel dan – thal, nipui, fur, furpui, thlasik, etc, te a ni a. Heng hunah te hian khaw lum tak te, tui harsatna te, ruah tam lutuk vang a leimin,lei tawlh, etc, te a ni, lo inring lawk thin lo tan chuan a buaithlak leh hle ang, lo inhmakhua lawkte tan erawh a ziaawm leh hle ang. Vannei fate chu heng khuarel sik leh sa te hian a ti buai ve em em lovang a,hlim takin an hmang ve zel thei ang a, vanduai fate tan erawh buaina belh chhah tu mai alo ni ve reng bawk ang. Thenkhat chu sum harsatnaten min tlak buak ang a,a then hrisel lohna ten,. Mi tha leh fel kan tih em em te pawh khan vanduaina an tawk ang a,rin loh deuh te khan malsawmna an dawng lawi bawk ang a.Kan nitin hna theuh ah te pawh harsatna kan tawk leh hlawm ang a,kan lo hma chhawn dan erawh a ni ang lo leh hle hlawm bawk ang.Hetih lai hian then khat chuan hlimna leh lawmna, hlawh tlinna, etc, an hmu hlawm ang a, kan lawm hle ang a, kan lawm dan erawh a inang lo leh hlawm ngei bawk ang. Thenkhatin an vanneihna dawn te uanpui nan intihtheih nante an hmang ang a, a then ve thung chuan mi dangte tan malsawmna nih nan te an hmang ang aKum tawp kan han thlen leh meuh chuan a then chu khi tah,a then chu khu tah,kan hma lam hun tur hi eng mah kan hre lawk thei mang si lova le,eng pawh nise,thil eng pawh,a tha lam emaw a chhe lam emaw pawh lo hma chhawn thei zel tura kan in buatsaih thin hi a tha hle awm e. Kan thu tar lan takte, a then hi chu keima experience atanga tihte a ni a, chuvang chuan a applicable lutuk lo mai thei a; mahse, ngaihtuah dan tur chu a siamsak theih tho che ka beisei. Kan thil hriat ve reng tura ka han duh pakhat ve leh chu, “ruahman lawkna chu mihring chan a ni a, a hlawhtlinna erawh Chung lam chan a ni ve thung,” tih hi a ni. Kum thar chibai tih pahin kum kan hman chhoh leh zel turte dam tak leh hlim taka hmang chho zel thei turin duhsakna ka hlan a che u.