Aizawl: Lai Autonomous District Council kalzel dan tur chu Governor kutah a innghat a, naktuk lam chuan a hawi lam tur a hriattheih beisei a ni.

Zalen palaiin District Council Affairs thawktute a biaknaah LADC awm zel dan turah rawtna siam an nei tih sawiin file pawh kaltir a ni tawh tih an sawi a. Governor hi Guwahati-ah a awm mek tih sawiin fax hmangin an rawtna te an thlen a, Governor thuneihna liau liau anih avangin a thu thu niin an sawi. Zalen thudawn danin Congress lamin an laka hela United Legislature Party dintu MDC 5-te bân tura an ngenna leh United Legislature Party (ULP) lamin sawrkarna siamtir tura an ngenna pawh Governor hian engtin mah a la chhang lo niin an sawi. Thudawn danin Congress hian Governor hmuh tumin Guwahati an kalchilh a, ULP lam pawh Aizawlah an inkulh mek. LADC session hi July 24, 2019 hian neih a ni dawn a ni.

Lai council inhruipawhna
LADC-ah hian ruat seat 3 nen seat 28 a awm a, Congress MDC 4 leh Independent MDC 1 chuan T.Zakunga kaihhruai sawrkar thlawpna hnukdawkin MNF MDC 8 nen United Legislature Party an din a. Sawrkar chuan elected MDC 12 chauh a neih tak avangin MDC nei tam zawk ULP chu sawrkarna siamtir turin Governor an ngen a, Congress chuan nominated MDC 3 nen MDC 15 an la nei tih sawiin member la ngah zawk an inti thung.