Aizawl: Nimin tlaia Assam police leh CRPF venhimna hnuaia Silchar Mizoram House atanga Mizoram rawn luh tum lirthei 9 te chu nizan 6:30 vel khan Lailapur-ah mipui pungkhawmten lo beiin, kut an lo thlak a. An lirthei an tihchhiatsak bakah hliam tuarte pawh an awmin Silchar Mizoram House lamah an let a, Ashok Singhal, Urbun Developmemt Minister, Assam  chuan Chief  Minister Zoramthanga biain motor pasarihte chu escort-na hnuaiah Mizoram luhtir tumin beih that leh a nih hnuah an rawn lut a, a dang pahnih chu vawiina Mizoram pantir tum a ni bawk.

Lailapur-a mipui pungkhawmten an lo beih zinga tel truck driver pakhat hnen atanga ZALEN thudawn danin, nimin tlai dar 3:30 bawr vel khan Silchar Mizoram House atangin escort (lirthei pathum)-na hnuaiah Mizoram panin an rawn chhuak a, anmahni escort-tute hian kawng lakah an dinpui zeuh zeuh hnuah nizan dar 6:30 vel khan Lailapur an thlenin mipui lo pungkhawm thahnem tak chuan an lo tiding niin thudawnna chuan a sawi.

Inralrin hmanna pawh awm lovin hmanrua nen an lirtheite chu mipui chuan bei nghalin, lungin an vawm bawk a, Mizoram house atanga chhuak lirtheite chu khawih loh an nei lo nia thudawn a ni. 

“Mipui lo pungkhawm tam dan leh an lo inhawr khawm tam dan atangin Lailapur kan thleng dawn tih an hre lawk a nih a rinawm a, min lo chang ni berin a lang,” thudawnna chuan a ti.

Hetianga Lailapur miten hmanrua nen lirthei an beih a, an tihchhiatsak lai hian escort-tu AP leh CRPF te chu engmah ti loin hmuhzui tur pawh an awm lo tih thudawnna chuan sawiin, “Kan sahimna atan mahni remchan dan ang ang tlan darh mai loh chu tihtheih kan nei lo,” a ti.

Lailapur mipuite hian Mizoram luh tum lirtheite hi an hmuh remchan ang ang an khawih a, lirthei chhiat dan tak erawh he thu ziah lai thleng hi chuan kimchang taka hriat mai theih a ni rih lo a. Lung leh hmanraw danga an beihnaah hian hriat theih chinah hliam tuar mi pathum vel an awm nia hriat a ni.

Mahni sahimna zawnga an tlan darh hnuin an remchan ang angin Silchar Mizoram house lamah an let leh a, he thu ziah lai, nizan dar 9:00 thleng khan lirthei thenkhat chuan Mizoram house a thleng leh tawh a. Motor pasarihte erawh venhimna hnuaiah Mizoram luhtir an ni. 

Vairengte Police Station-a police duty-te hnen a\anga thu dawn danin nizan dar 9:30 khan lirthei rawn lut hmasa ber chuan Vairengte police gate a thleng a. Nizan dar 10:30 thleng khan lirthei panga, tanker pathum, cosmetic phur leh damdawi phur pakhat ve ve chuan Vairengte an rawn lut tawh.