ZALEN, Apr. 07, 2025: India rama Fashion Week lian ber tia chhal ngam, Lakme Fashion Week 2025 neih zawh takah Mizo model pahnih leh Mizo stylist pakhat chuan hming an chher hle. Mizo hmeichhe model phei chu model thar tha an tih 11 zingah a tel.

March 26-30, 2025 chhung khan, Mumbai-a Jio World Convention Center-ah Fashion Design Council of India (FDCI) leh Lakme Fashion Week tangkawp chuan, an kum 25 tlin champha lawmna pualin Lakme Fashion Week 2025 buatsaih a ni. Hetah hian Mizo model pahnih — Kristina Vanlalzami leh Lalhriatpuia Ralte (HP-a) ten ramp an zawh a. Anni bakah hian Mizo stylist James Lalthanzuala pawhin Indian designer lar a style-sak bawk.

Indian designer hmingthang tak takten show an neihna, Lakme Fashion Week 2025-a inlan tur hian a duh apiang tel theih satliah a ni lem lo. Designer-ten uluk takin an model tur an thlang a. Audition paltlang ngai zawng zawngte hi Kristina Vanlalzami leh Lalhriatpuia Ralte te hian an paltlang.

Fashion show lian leh ngaihhlut hlawh taka designer pakhat tan pawha inlan hi model tan pawh thil harsa tak a ni. Tun tumah hian Mizo model Kristina tan show chhinchhiahtlak tak niin, model tam takin an thlen phak lohna a thleng. He show-ah hian designer pali — Rkive City, Rahul Mishra Afew, Falguni Shane Peacock leh Pearl Academy tan a inlan thei a ni.

Kristina hian mipui lawm a hlawh hle. Fashion industry-a hming an lam zin leh hriat hlawh em em mai — Vogue — phei chuan model thar tha an tih 11 zingah a tel phak hial a. Social media lamah pawh a thlalak hmuh tur a tam phah hle. Tunah hian Model Agency changtlung tak — Anima Creative — in an represent mek a ni.

Lalhriatpuia Ralte pawhin he show-a inlan tur hian model 300 chuang casting zingah 10 an thlan chhuahah a tel phak a. Ani hi tun tumah hian Pearl tan a inlan thung. Lakme Fashion Week-a a inlan vawi khatna a ni nghe nghe.

Mizo model pahnihte bakah hian Mizo stylist James Lalthanzuala pawhin kumin Lakme Fashion Week-ah hming a chher bawk. He show-ah hian Indian designer lar, Rahul Mishra Show-ah a style-sak bawk a. Rahul Mishra hi Indian fasion designer-te zinga Paris-a Haute Couture Week-a show nei thei hmasa ber a ni.