Mizoram Chanchinbu mite chu mi thenkhatin fiamthu in, “Lal uma te an ni” an ti thin a, Chief minister, Council of Ministers, Politician leh sorkar mi pawimawh hnungzuiin Zoram dung leh vangah lal kan lo um thin tawh vang a ni a, tun tum chu lal um thina khan Synod Mission Board Secretary Rev. Lalchhuanmawia hnung zuiin, Tripura South Presbytery hmangin Karbook-ah Presbytery hmangin kan fechhuak daih mai a, a boruak a danglam khawp mai. Mizoram chhung kawng chhiatzia chu sawi tam ngai lo sa, kan State thenawm Tripura chu ziaawm tak a ni a, kal kawng tluanin an Rubber chin hmuh tur a awm a, an State sorkar chuan hna a thawk nasa viau a ni tih rubber kung tam tak atang ringawt pawh hian alang sa run mai a, an kawngpui a tha viau zel a, kawngpui sirah an State Forest park hmuh tur a awm nual a, a fai hun mai a, a awh awm khawp mai. Mit la tak mai chu an Electric hrui ban a ni a, keini chuan Thir ban lian tak tak, tui ek bem bum kan hman laiin, an ni chuan Cement chhun, a ler lam zuih, pan fel thlap mai an hmang thung a, a man a tlawm zawk ang a, a daihrei in, a enkawl pawh a nawm hmel fe zawk a ni. Kan Synod Mission Board hma lakna a Tripura ram chhunga Mission hmun, Pastor thutchilh a School dinna hmun hrang hrang a theih ang ang kan tlawh nghal a, heng hmun kan Synod Mission Board hmalakna chu a chhuanawm khawp mai a. Kan thingpui inna, Pacharthol, kan zanriahna Ambassa, kan thingpui inna Tuidu leh kan chaweina Burburia mission compound a felfaiin, School class 8 thleng a awm a, a hmun a nuamin, building leh Biak In pawh a tha ang reng viau zel a, thawktute an hawihhawmin, an fel a, an inpe em em a, hlimhmel an pu sang reng a, hmuh an nuam a, an bula awm pawh a nuam khawp mai. Karbook-ah chuan, an Pastor inah kan thleng a, zan inkhawmah kan tel ve nghal a, an mahni tawng Kokbrok leh Mizo tawng inchawlhpawlh an hmanga, Mizo tawng ai chuan Kokbrok an hmang tam zawk a, an hla pawh Kokbrok vek a ni a, Mizo ten Minor kan tih thluk a ni a, a mawi danglam khawp a, Mizo hla an mahni tawnga leh te pawh an sa tel bawk. Upa thutnaah ka thu ve vang mai a, inhmelhriattirna te an han nei a, Moderator-in min han dintir a, kan thut leh hnu chuan, ka tun hma nun ka ngaihtuah chhuak a, politician leh sorkar milian zuiin Zoram hmuntin hmun tang kan zin a, an P.A ten emaw inhmelhiattirna an neih nen chuan danglam tak a ni. Oct. 11, 2012 Inrinni chawhnu dar 1 chu ka tan theihnghilh chi a ni tawh lo, Tripura South Presbytery Moderator Pastor Kiron Debbarma chuan rorel inkhawm tan hmain tawngtai turin min han sawm thut mai a, hei zet hi chu ka beisei phak loh a ni a, ka hnukte pawh a ulh rum rum. Rev.Lalchhuanmawia SMB Secy chuan Oct. 12, 2014 chawhnu inkhawmah Sacrament a theh a, a thusawi chuan min barakhaih a, ka hmai a uang hret a, a chhan chu Mizoram Journalists Association (MJA) Kolasib a kan hotu kumhlun, Prominent Journalist a sorkarin a puan tak Upa S.Lalhmachhuana hming a lam tel, Rev. Lalchhuanmawia chuan a tlangval laia Chhinga veng kohhran tirha Tripura an tlawh tumin, Pu S.Lalhmachhuana chu missionary a ni a, Kokbrok tawnga thu a sawi a awhzia a chham tel vang a ni. Kum 2016-ah Mizoram Synod hrinchhuah liau liauin Tripura Synod lo piang pawh nise, Mizoram Journalist Association memberte chuan hnu hma kan lo nei ve reng a, Pathian rorel dan hi a lo va mak e. “Chanchintha puangdarhtute Ke chu ava lo mawi tak em!.” Karbook, Burburia, Udaipur leh Kalachhara Pastor biala Mizo nula tlangval Missionary te khawmpui ni zawk awm tak Tripura South Presbytery ah chuan Palai tam ber an ni a, Bial zaipawlah an tel a, uar em em in Pathian fakna hla an sa a, an aw mawi leh mawi loh lam a ni ta hauh lo mai, a mi khawih dan a danglam riau. Dingdi chanchinbu a kan news Editor hmasa ber, Rev. Lalchhuanmawia SMB Secy chuan, ‘Tripura Field Secy Rev. Lalengzika chu i hre em em ang’ ti chungin Agartala Municipal Council Office ep chiaha Tripura Mission Field Secy Office leh chenna in chu kan thleng a ni ta der mai a, a hmel ka hmuh hma kha chuan ka bangbo viau a, an nupain min lo hmuak a, kan hmu chu, “Aizawl Football Club” team hmasa zinga Football khela hma lam hun eng tak nei zinga sawi, Chaltlang khua, Shillong MSU aiawh a Laldenga Gold Cup rawn khelh, AFC hotu hmasa Pu Dengchhuana IAS (rip)-in, ‘Khu tlangval chu, AFC-ah lak ngei ngei tur, engzah man pawh nise’ a tih lai kha ka rilru a rawn lang zawk a, a hunlaia Football khel thiam ber zinga mi kha Reverend Lalengzika chu lo ni rengin, an nu lah chu Thangruma Stationary nghak thin, kan paper leina ber lo ni lehzelin, khawvel hi a lo va mak thei ngai em! Chaltlang khua, Aizawl tlangval ngat, palian sa inphut mawi tawk tak mai, a hun laia keinin ‘Zika’ kan tih te Inah chuan chaw tuihnai tak kan ei, kan chaw ei lai chuan, “Mizoram Synod Ropuizia” ka ngaihtuah daih a, Aizawl tlangval ngat pahnih, Pathian thu lam zir lo pawh ni ta teh reng se, ei zawnna lama “Kei ka ni” inti thei ve ve turin Synod kaltlangin Ramthim ramro pawh sawi lovin Lalpa avangin an hun zawng zawng an hmang chu lawmawm ka ti khawp mai a, a ropui pawh ka ti thlawt a, Mizoram Synod chhulchhuaka Tripura Synod piang thar turah MJA member ten hnu hma kan neive tlat mai hi Zoram mipui kan barakhaih viauin ka ring bawk a ni. — - Lalhmachhuana Tochhong