Basketball lamah pawh Mizorama inelna sang bera a thiam ber nihna lo hauh fo tawhtu, Lalrina Renthlei chu Indian Pool National Championship-ah pathumna niin bronze medal a hawlh chhuak.

Daly College, Indore, Madhya Pradesh-a Indian Pool National Championship (9 & 10 Ball)-ah khelh mekah hian 9 Ball Pool inelna bikah Inrinni khan Lalrina hi semi final-a vawi 10 chak hmasa sa inelnaah Delhi tlangval, Sundeep Gulati lakah 10-4 a tlawmin bronze a la ta a ni.

Tuikhuahtlang tlangval, kum 32 mi, Lalrina hi pool bakah basketball-ah pawh a khelhna club leh Mizoram tihmingtha fo tawhtu a ni a. Mizorama basketball inelna sang ber, Mizoram Super League (MSL)-ah pawh vawi nga lai champion nomawi lo la tawh a ni.

MSL-ah hian Mission Veng Vikings chu vawi khat champion-puiin tuna a khelh mekna, Zarkawt BCA chu vawi li a champion-pui tawh bawk a. Guard rinawm tak hian MSL-a player mal chawimawina sang ber, Most Valuable Player (MVP) pawh vawi thum a lo dawng tawh bawk.

Mizoram tana tun tuma an feh chhuahna, Indian Pool National Championship (9 & 10 Ball)-ah hian Mizoram aiawhin Mizoram Snooker & Billiards Association (MSBA) chuan ani bakah hian PB Liansangzuala, Dawrpui, Aizawl leh Laltlansanga, Lunglei te tir bawk a. 9 balls hi khelh zawh tawh niin 10 balls inelna an khelh chhunzawm leh mek.

National championship hi September 1 atanga tan kha niin Zirtawpni hian zawh a ni ang.