LAMINE YAMAL: Homework nen Euro khel turin thawk chhuak!
![](https://zalen.s3.ap-south-1.amazonaws.com/images/news/1718434874_ya.jpg)
Mizo naupang (a kum enin ‘naupang’ tih kan inthlahrung lo mai) chu ni sela Spain leh Barcelona star Lamine Yamal hi pawl 10 zir vel mek chauh pawh a la ni mai thei a. An ramah chuan matric kan tih ang tak hi awm ve lo mah se sikul naupang erawh a la ni chiang e!
Kum 16 mi chauh, Yamal-a hi Inrinni zana Croatia an hmachhawn huna Luis de la Fuente-a’n a khelhtir chuan Europpean Championship-a khel thei naupang ber a ni dawn.
Spain-a Moroccan leh Equatorial Guinean nupa kara piang, Yamal-a hi an hmachhawn tur, Croatia captain Luka Modric-a’n inelna lian a khelh hmasak ber, 2006 Germany World Cup-ah khan a la piang lo!
ESO (Spanish secondary school)-a 4th year ni mek chauh, Yamal-a hi Euro 2024 chhung hian Spain tan chauh a insawrbing thei dawn lo va, nipui chawlh chhunga tih tura sikulin an pek (homework) zawh ngei a ngaih avangin Germany-ah a zirlaibu nen a inak chhuak.
Yamal-a hi kum 15 mi lek nia club tana a inlan tan hnuah season liam taah khan Xavi-a chuan Barcelona-ah bul tantuah a hmang tam hle.
La Liga-a a season hmasa berah hian league-ah vawi 37 inlanin goal nga a thun a, a thiante tan vawi riat a siamsak bawk.
Spain coach de la Fuente pawhin Euro 2024 khel tur player 26 a thlan zingah a tel a. Winger hi La Roja tan vawi sarih inlan tawhin goal hnih a thun tawh.
Tournament tan hma lawka chanchinbu miten an kawmnaah, “ESO 4th year ka la ni mek a, ka homework nen ka thawk chhuak,” tiin a sawi.
“Online-in class ka kal thin a, kan zirtirtute pawhin min hre thiam hle a ni,” a ti bawk.
“Hun reilo te kal taah kha chuan Euro hi kan sofa-ah thuin ka en kha a ni a. Euro 2020 (kum 2021-a khelh) pawh khan bazarah ka thiante nen kan awm laiin kan en a, tunah erawh ka khel ve dawn ta reng mai,” a ti.
Spain-in Inrinni zana Croatia an hmachhawn hunah coach De la Fuente-a’n a khelhtir a nih chuan Yamal-a hian record a siam dawn a. “Hetiang footballer hi chu a bik (special breed) an ni,” tiin kum 62 chuan Barcelona winger chungchang hi a sawi.
“Naupang kum 16 mi lekin heti taka mahni inrintawkna, tha taka khelh theihna leh veteran ang maia a awm thei hi thil pangngai a ni lo. Chu chu he team-a tel tura kan thlan chhan pawh a ni,” a ti.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024