Pachhunga University College (PUC) Cultural Club chuan July 30, Zirtawpni khan msuic video pui tham tak mai ‘Lamlian Lehlam’ chu an tlangzarh.
Tlangzarh programme hi zoom leh livestram hmanga neih a ni a, PUC principal Prof. H. Lalthanzara chuan a tlangzarh a ni. He hunah hian principal kalchhuak ta Dr. Tawnenga pawhin thu a sawi a, video enhona neih nghal a ni.
Music video hi PUC official YouTube channel Pachhunga University College Channel’-ah upload a ni a, viewer pawh mi sing nga chuang an awm der tawh.
Video hmuhnawm leh dangdai tak mai hi Asanga Dosel kutchhuak a ni a, he music video siam kawnga tha thawhtute inpekna leh thawhrimna hmuh hmaih chi rual a ni lo.
He music video-ah hian Mizo hnahthlak thuam hrang hrangte tarlan a ni a, hengte hi Zoram hmun hrang hrang atanga lak khawm niin, Mizo thuam mawizia, ropuizia leh a hlutnatarlan a pholang tha hle.
Video-ah hian Mizo hnam lam chi hrang hrang - DAKCHA LAM, SARLAMKAI, TLANGLAM, BUHZAAIH CHERAW, RAWKHATLAK/ZIALUNG CHERAW/RAM KALSIAM, KHUALLAM/THINGDIM, CHHEIH LAM, CHAWN LAM, SOLAKIA, PAIKAWNG LAM, DAR LAM leh CHAWNGLAIZAWN te tihlan a ni a, thlir manhla tak a ni.
Dakcha Lam-ah hian siapsuap an feng a, sarlamkai-ah hmeichhiaten congnak kawr hain hnika an hih thung. Thitial leh thihnun awrhin chumhi kharvar leh tangka kawnghen te an kawngah an hreng bawk a ni.
Mipa ten lupawg hmangin an chhipah sam an zial a, an sam zialah dawhkilh an thiat va bawk. Kawlhni batin biarpi an kaih a, chempui an keng bawk - an thuam inbel ringawt pawh hi sawi vek sen a ni lo.
Mizo hnam peng hrang hrang thuam - Lusei, Ralte, Darlong, Bawm, Vaiphei, Thadou, Pang, Lai, Mara, Paite, Simte, Gangte, Hmar, Simhrin, Zou, Ranglong, Sukte ler Zahau te tihlan a ni bawk a, he music video hi nakin thleng pawha la hlu tur tak a ni - lo en ve ngei ang che.
