Mizoram sorkarin cheng tamtak sengin Lammual (AR Ground) chu a cheibawl a, Mizo infiammi, a bikin football player-te tan phei chuan lammuala phul lem (artificial grass) phah ringawt pawh lawmna a tling tawh a, grass phah mai duh tawk lovin, sorkar chuan gallery leh a thutna te nen lam a thuam changtlung chho zel a, India ram leh khawvel ram changkang zawka an tih theih ang chu Mizoramah pawh buaipui chhoh zel a ni a, zana inkhelh theih hial a lo ni ta hi a lawmawm hle. Amaherawhchu, hetianga sum tamtak senga khelmual tha sorkarin infiammite duhsak taka a chhawpchhuahsak mek lai hian, lungawiloh vanga bungrua tichhe zawnga thiltih erawh chu thil tha lo tak a ni awm e. Lungawilohna leh buaina tamtak hi chu thil thleng pangngai renga ngaih theih a ni a, amaherawhchu, thinrim hrikthlak nana bungraw tihchhiat ang chi te hi chu tun hnu-ah thleng zui tawh lo se a duhawm hle ang. Inkhel entu (fans) ten zana inkhel en an zo lo dawn a nih chuan, sorkar ang hial pawha zana inkhelh tihtawp mai ngaihtuah a tul maithei tih Chief Minister meuhin a sawi hial a, sum senga cheibawltu tan chuan bungraw tihchhiat mai hi thil runthlak tak a ni lo thei lo. Mahni ta anga ena uluk leh duat taka enkawl tur zawkin a tichhe zawnga thil an tih fo chuan, bungraw dangte pawhin a tuar zel lo ang tih a sawi theih loh bawk. Zan boruak hrim hrim hi a hrisel lo a, sual tihna hun remchang tak a ni hrim hrim. Lammual gallery seat engemawzat tihchhiat pawh hi chhun en laia inkhel nise a thleng kher lo mai thei! Chuvangin, inkhel entute hian nunchang mawi an zir a ngai a, bungraw lamin a tuara a chhiat phah zel ai chuan zana inkhelh tawh loh mai a fuh zawk mai thei! Assam Rifles lamin Lammual an 'Keipui sahauh' tia mi tamtak an iak an iak fona chhan pawh, a neitu zawk chuan duat leh dimdawi taka enkawl tur a nih laia, bawlhhlawh leh thil tihchhiat a awm fo thin vang a ni thin. Lammual hi a hmun a laili a, tute tan pawh pankhawm a remchang a, Mizote rohlu ber zinga pakhat a ni. Lammual chauh a ni lo a, sum tamtak senga hmun hrang hranga field cheibawl mekte hi dimdawi nachang hriat a tul tih infiammite leh mipuiten hriat a tul khawp mai. Chuvangin, lammual leh khelmual dang dangte pawh, inkhelh nan kan hmang a ni emaw, thil dang tihna atana kan hmang a nih pawhin duat leh dimdawi taka enkawl a tul takmeuh a ni.