Aizawl :  Human Resource Development Board (HRDB) buatsaih, ‘Mizo Language Board Thlir Lâwkna’ chu Hyve Aizawl City Hall-ah neih a ni a. Mizoram hmun hrang hrang leh ram pâwn atang pawhin Mizo tawng lama tui mi leh mi thiam rualin thu an sawi a ni. School Education Minister Lalchhandama Ralte leh L. Thangmawia, MLA, Vice Chairman, Human Resource Development Board te an tel a ni.

He Mizo Language Board Thlir Lâwkna hi Dr Rosaline Varsangzuali’n a kaihruai a. School Education Minister Lalchhandama Ralte chuan MLB din tum a nih dan leh hmalakna kal mêk chungchâng sawiin MLB din tura hmalakna hi Chief Minister-in HRD Board meeting a neihpui tuma Mizo tawng chungchanga hmala tura a chah bawhzuina a nih thu sawiin he hun hi a hawng a.

Thupui thlan bik panga hmangin he sawi hona hun hi hman a ni a. Mi thiam, sâwm bikte hian anmahni thupui chan chu minute nga theuh an sawi a ni. He sawi hona hun hi L. Thangmawia, MLA, Vice Chairman, Human Resource Development Board chuan lâwm thu sawiin a khâr a ni.

He sawi hona hun hi zau zâwka mipui ngaihthlâk theih turin Youtube-ah leh TV-ah tihchhuah tum a ni. TV-a tihchhuah tur niin, LPS leh Zonet ten December 13 & 14 zan dar 8:00-ah an tichhuak ang a, DDK chuan December 14 & 15 khian tihchhuah a ni thung ang.