Congress hruaitu hlun, Mizoram larsap hlui, Vakkom Purushothaman chu Thawhtanni khan kum upatnain a ken tel natna hrang hrang avangin a thi a, chief minister leh larsap ten an social media kaltlangin a ui thu an puang.

Purushothaman-a hi Thiruvananthapuram, Keral-a an chenna inah a thi a, kum 96 mi a ni.

Kerala-a Travancore district khawpui, Trivandrum bul, Vakkom-a April 12, 1928-a piang, Purushothaman-a hi Mizoramah kum hnih leh a chanve chuang a awm a. September 2, 2011-ah Madan Mohan Lakhera thlaktu atan lak luh niin July 6, 2014 thleng a awm a, Kamla Beniwal-a’n a thlak a ni.

A thi tih a hriat rualin Chief Minister Zoramthanga chuan a ui thu a sawi nghal a. “Mizoram governor hlui, Pu Vakkom Purushothaman-a kum 95 mi niin a kal ta tih hriat hi hrehawm ka ti tak zet a ni,” a ti a. “A chhungte leh a laina zawng zawng ka tawrhpui a, an hun hrehawm takah hian Pathianin awmpui chakna pe se ka duh a ni,” tiin a tar lang.

Larsap Dr. Hari Babu Kambhampati pawhin, “Mizoram leh Tripura governor hlui, Pu Purushothaman-a a awm ta lo tih hriat chu chu a hrehawm hle a. A chhungte ka tawrhpui a. A thlarauvin zalenna/chhandamna (sadgati) chang rawh se,” a ti.

Kerala-a Congress party hruaitu ngaihsan hlawh leh he state-a an party thanna kawnga thawhhlawk tak niin ‘guru’ ti hialin tun laia an hruaitute chuan an sawi.

Purushothaman-a hi Kerala Assembly-ah Attingal bial atanga vawi nga thlan tlin niin vawi hnih minister a ni a. Hetih lai hian agriculture, health leh tourism te a chang thin a. Kerala assembly-ah hian speaker ni rei ber ni bawkin kum 1982 leh 1984 bakah 2001 leh 2004 inkar a ni.

Alappuzha bial atangin Lok Sabha member atan pawh vawi hnih thlan niin kum 1984 leh 1991 inkar parliament-ah a thu.

Politics khelhna lam a chawlhsan hnuah Purushothaman-a hi Andaman & Nicobar Islands lieutenant governor parukna atana dah niin kum 1993 leh 1996 inkar a awm a. Mizoram-a a awm chhung hian thla hnih chhung Tripura larsap niin a hmui bawk.