ZALEN December 17, 2023 : Nimin December 16 kha hnehna ni (Vijay Diwas) a ni a, he ni pual hian zing karah War Memorial, Treasury Square-ah hun hman niin Governor Hari Babu Kambhampati chuan a hmanpui.

Governor Kambhampati chuan India sipai huaisente zahna chibai bukin Martarte thlanah pangpar a dah hmasa ber a. Chief Minister Lalduhoma leh mi pawimawh dangte pawhin governor hnung zui hian Martarte zahna an lantir.

Sawrkar, civil leh sipai lam hotute atangin Home Minister K.Sapdanga, Chief Secretary Dr Renu Sharma, Hav Lalbiakthanga, Padma Shree recipient leh War Veteran ni bawk, Home Commissioner H.Lalengmawia, Brig Girish Upadhyay, ADGP Ajay Chaudhary leh mi pawimawh dangte pawhin zahna lantirin War Memorial-ah hian pangpar an dah a ni.

Hnehna Ni hi kum tin December 16-ah India ram pumah hman thin a ni a. Hemi ni hi India sipaiten Indo-Pakistan War of 1971-ah Pakistan laka hnehna an chan ni leh tunhmaa East Pakistan, tuna Bangladesh pian chhuah ni hi a ni.

He indonaah hian Pakistan sipaite chu tlawmin an awp ram, East Pakistan tia hriat chu Bangladesh tia thlak a ni ta a. He mi tum hian Pakistan sipai lalber (Chief of the Pakistan Forces) General Amir Abdullah Khan Niazi chu a sipai 93,000 zet nen Ramna Race Course, tuna SuhrawaryUdyan, Dhaka-ah General Jagjit Singh Aurora kaihhruai allied force (India sipai leh Mukti bahini) hmaah an inpe a. Hemi ni hi Bangladesh chuan Bijoy Dibos tih hmingpuin an lawm thin.