ZALEN September 28, 2026: Mizoram Larsap General (Dr) Vijay Kumar Singh chuan vawiin khan 2026-2029 chhunga ruihhlo do beihpui thlakna tura ruahmanna 'State Action Plan to Combat Drug Menace 2026-2029' chu Assembly Annexe Conference Hall, Aizawl-ah Khuallian niin a tlangzarh. Khualzahawm Home Minister K. Sapdanga chuan Khawzawl district-a Tlangmawi khua chu Mizorama ruihhlo laka fihlim hmasa ber khuaah a puang a, khawtlang hruaitute certificate a hlan a ni.

Hemi puala hun hmanah Larsap General (Dr) Vijay Kumar Singh chuan Sawrkarin tanrualna hmanga ruihhlo do a ngaih pawimawh thu sawiin, Prime Minister-in kar 100 awh tur ruihhlo do beihpui 'Nasha Mukh Bharat Sankalp Abhiyan' August ni 2, 2026 ah a tlangzarh thu leh India ram chu December 31, 2029 ah chuan ruihhlo hmanga sumdawnna awm lohnaa siam tum a nih thu a sawi. "Tun hi a bultanna a ni a, kum 3 hnuah a rah chhuah kan hre thei dawn a, a hlawhtlin theih nan kan zavaiin lungrual taka kan thawh ho a tul a ni," a ti.

Larsap chuan Mizorama ruihhlo laka khaw fihlim hmasa bera puan tak Tlangmawi khaw mipuite thinlung taka a lawmpui thu leh chhuanawm a tih thu sawiin, hei hian khawtlang inlungrualna leh inpekna a entir a, Mizorama pum ruihhlo laka filhim siam turin mitinin mawhphurhna kan nei a ni, a ti.  

Home Minister Mr. K. Sapdanga chuan hun hman chu ruihhlo laka Mizoram hmalam humhim tura thutlukna puan chhuahna, ram leh hnam humhim nana intiam tharna a nih thu a sawi a. Ruihhlo laka thalaite an fihlim theih nan zirna in ah drug awareness campaign kalpui uar lehzual a tul thu a sawi a. Ruihhlo laka fihlim ni tura Tlangmawi khaw mipuite tanrualna leh huaisenna fakawm a tih thu sawiin, ram pum tan thuchah ropui tak, ruihhlo laka zalenna an puanga, midang tana chona thianghlim tak an rawn chhawp chhuak a ni a ti. 

He hunah hian Social Welfare Minister Lalrinpuii, Sawrkar official, khawtlang hruaitute, NGO leh kohhran hotute bakah zirlaite an tel a ni.