Aizawl: ZPM Working President K. Sapdanga chuan Lengteng constituency a khaw hrang hrang, Hliappui, Ngopa, NE Khawdungsei leh Saichal khuate tlawhin heng khuaah te vantlang inkhawm a neih naah Last minute hmanga rorel tumna leh dahkham politics tihbo an tum thu a sawi.

ZPM Working President chuan, “ZPM chuan last minute hmanga rorêl tumna hi dah nil kan tum. Inthlan dawn zanah iptemawi ak a, chibai sem kual hmanga mipuite buma rorelna siam hi tih bo kan tum a, a dah nil theitu erawh chu mipuite kan ni. Diknain last minute politics bawlhhlawh hi um bo kan tum a ni. Hei mai hi ni lovin 'Dahkham politics' hi tihbo kan tum bawk. Mi hausa thenkhatin inthlan dawn hnaiah sum tam tak party thenkhat hnenah an dahkham thin. Inthlan zawh veleh tu party pawh sawrkar se la, suitcase nen McDonald Hill an pan chho a, work order hmangin leiba an thing thin a ni. Kan ram roreltuten tu emaw sum bawm milin hlauh an nei thin hi ZPM party hian dah nil kan tum. Kan ram roreltu lu ber hian siamtu Pathian hi tih se la. A thil tih engah pawh chunglam mitmei vengin  programme siam rawh se. He ramah hian Pathian tihna nen ro i rel ve tawh ang u tiin kan in chah duh a ni,” a ti.

K. Sapdanga chuan, “ZPM party ten kalphung thar aupuiin Zoram kil tin kan fang kual a, heta kan thil hmuhchhuah chu khaw tinah mipuiten kalphung thar an nghakhlel em em a ni tih hi a ni. Khaw kilkhawr apiangah an mangang leh zual. Hmun hrang hrangah a bik takin minority ten he kalphung thar hi an beisei hle tih te kan hre leh zel a, nitin mi thar duhawm tak takin ZPM party hi an bawh a ni. ZPM hian mipui mamawhna kan phuhru zo lo ang tih kan hlau a, ram pum huapa kalphung thar kal pui a, mipui huapzo hmasawnna a thlen theihna tûrin kan inbuatsaih sauh sauh a ni,” a ti a.  bawk.