Maldives Open 2024 - 10 Ball Pool Championship-a inlan tur,  Lalrina Renthlei chuan intihsiakna neihna hmun tur a thleng ta a, Thawhlehni hian a inkhel nghal ang.

Basketball lamah pawh hnuhma ropui tak lo nei tawh, Tuikhuahthlang pa hial Thawhlehni chhun dar 12:00 hian khawvel huapa player tha, kum 2018-a World No. 1 leh European champion pawh lo ni tawh, Greek pa, Alexander Kazakis a hmachhawn dawn a ni.

Mizoram Snooker & Billiards Association (MSBA) player Lalrina hi MSBA President leh Billiard & Snooker Federation of India Vice President Vanlalnghaka’n a tawiawm.

Maldives Open khel tur hian Mizo tlangval bakah India atangin player dang pali - National 10 Ball Pool Champion Shivam Arora (Maharashtra), National 10 Ball Pool Quarterfinalist Kushal C (Karnataka), Chetan Chhapra (Hyderabad, Telengana) leh Laksh Sharma (Karnataka) te an kal bawk.

Maldives Pool Billiards Association (MPBA) buatsaih Maldives Open 2024 hi Pathianni thleng khelh tur a ni a. Lawmman pawh $ 1,30,000 zet niin khawvela pool player tha ber ber inlanna thin a ni a, nikum khan Ko Ping Chung (Chinese Taipei) a champion.

Kuminah pawh hian champion lai bakah World No. 1 Fedor Gorst (USA) leh tum thum zet world champion lo ni tawh, Thorsten Hohmann (Germany) te pawhin an khel dawn a ni.