ZALEN, May 24, 2026: Inrinnia khelh zawh tak, Yonex Sunrise PC Gabriel Lalliansanga Memorial MBA Junior Championship 2026-ah Vanlalhruaia Sailo leh Lalruatkimi te chuan nomawi pathum ve ve lain an langsar fel dun hle a. He inelnaah hian lawmman Rs. 1,11,900 sem ral a ni a ni.

Triple crown

Chaltlang Badminton Club (CTBC)-a khel lai, Hruaia Sailo hi a telna category zawng zawngah a champion vek a, a triple crown a ni. Under 19 Boys’ Singles final-ah Remruatkima, Kulikawn Badminton Club hnehin a champion a. Isak Vanlalhmangaiha, New Serchhip Badminton Club (NSBC) nena tang dunin Under 19 Boys’ Doubles leh Under 19 Mixed Doubles-ah H. Lalrinhlui, CTBC nen tang dunin an champion bawk.

ITM Academy, Raipur, Chhattisgarh-a TATA TRUSTS/NEIDA nena Mizoram Badminton Association (MBA) thawhhona kal zela inzira awm mek, Hruaia Sailo hi kumin hi Under 19 huanga a inlan vawi khatna niin nakkumah pawh a la khel thei dawn.

Tun dinhmun a thlen theih chhan pakhat, a club khelh mekna chungah lawmthu a sawi. 

NSBC-a khel lai, Ruatkimi pawhin Hruaia Sailo ang bawkin a telna category zawng zawngah champion-in a triple crown ve bawk a. Under 13 leh Under 11 Girls’ Singles bakah Rosalyn Remlalmuani, Saron Badminton Club nena tang dunin Under 13 Girls’ Doubles-ah an champuion bawk.

Ruatkimi hi coach Tluanga’n Serchhipa a hruai mek lai a ni a, h a enkawl mek a, a pa, Lalremruata chuan a fanu champion chungchangah an club leh coach chungah lawmthu a sawi. 

Result dang

Hruaia Sailo nena Under 19 Mixed Doubles-a champion, Rinhlui chu Under 19 Girls’ Singles-ah a champion bawk a. Lalruattluanga Tlau, NSBC chu Under 17 Boys’ Singles leh Boys’ Doubles-ah champion kawpin Zoramthari, Sihphir Badminton Club chu huang pathumah final lutin Under 17 Girls’ Singles-ah a champion a, Under 19 Mixed Doubles leh Under 19 Girls’ Single-ah erawh final-a a tlawm zawkah a tang.

Under 15 hmeichhiaah T. Lalmuanpuii, Chhinga Veng Badminton Club-in rorelin Girls’ Singles-ah a champion bakah doubles-ah Lalthakimi, NSBC nen an champion bawk.

Under 15 mipaah K. Liansangzela, CTBC hneh thei an awm lo bawk a, singles leh doubles-ah a champion kawp a. Doubles-ah hian club khata a khelhpui, V. Lalhmingmuanpuia nena an inkawp a ni. 

Under 13-ah Mark C. Lalrinsanga, Saron Veng Badminton Club chu Boys’ Singles-ah champion a. Lalmalsawma Lianhna leh Zothanpuia Chhangte, Mission Veng Badminton Club (MVBA) tang dunin doubles nomawi an la thung. 

Under 11 Boys’ Singles-ah Mark C. Lalrinsanga, Saron Veng Badminton Club a champion bawk. 

Thawhlehni atanga Ramhlun Indoor Stadium-a khelh inelnaah hian CTBC leh NSBC player-te category pasarih ve ve-ah an champion a. Tournament hi PC. Lallawmsanga, IPS (Retd) chhungkaw bultuma neih niin a tel zawng zawngte hi lawmman hlan vek niin lawmman atana sum sem chhuah pawh a tam hle a ni.